«Фарғона» коллажи
Бельгия телекоммуникация соҳасида коррупция ва жиноий даромадларни легаллаштириш иши бўйича мусодара қилинган 108 миллион долларни Ўзбекистонга қайтаради. Бу ҳақда Брюссель прокуратураси хабар берди.
28 март куни Брюссель прокурори Мусодара ва ҳибсга олиш бўйича марказий агентликдан (COIV) Бельгия давлат ғазнасига 108 миллион доллар ўтказишни сўради. Телекоммуникация шартномалари билан боғлиқ коррупция ва пул ювиш ҳолатлари бўйича текширувдан сўнг пуллар ниҳоят давлат фойдасига мусодара қилинган. Афтидан, гап Ўзбекистон биринчи президентининг тўнғич қизи Гулнора Каримова билан боғлиқ иш ҳақида кетмоқда.
Аввалроқ Ўзбекистон суд органлари Бельгия прокуратурасидан БМТнинг Коррупцияга қарши конвенцияси асосида халқаро ҳуқуқий ёрдам сўраган эди. Марказий Осиё республикаси Адлия вазирлиги маълумотларига кўра, гап 240 миллион долларга тенг активлар ҳақида бормоқда. Тергов натижасида Бельгияда 200 миллион доллар ҳибсга олинган. Нидерландия суди мусодара қилинган маблағ ва ҳисобланган фоизларни икки давлат ўртасида бўлишга оид қарор чиқарган. Ушбу қарор доирасида Ўзбекистонга 108 миллион доллар ўтказилади.
👉 2022 йил сентябрь ойида Ўзбекистон Адлия вазирлиги Ўзбекистон биринчи президенти тўнғич қизининг хориждаги жиноий активларининг умумий миқдори қарийб 1,3 миллиард долларни ташкил этишини хабар қилганди.
2020 йил май ойида Франция Каримованинг 10 миллион долларлик активларини Ўзбекистонга қайтарди, ўша йилнинг сентябрида Швейцария Ўзбекистон билан 131 миллион долларни қайтариш бўйича битимни имзолади, 2022 йил февралида эса Франция яна 10 миллион долларни қайтарди. 2025 йил февралида Каримованинг мусодара қилинган яна 182 миллион доллар активларини Швейцариядан Ўзбекистонга ўтказилиши бўйича келишув имзоланган эди.
ℹ️ Гулнора Каримова ва унга алоқадор компанияларнинг жиноий фаолияти юзасидан тергов ишлари Европада 2012 йили бошланган эди. Каримова Ўзбекистон бозорига кириш учун телекоммуникация компанияларидан (TeliaSonera, Vimpelcom, Alfa Telecom, МТС) катта миқдордаги пулларни ноқонуний олганликда, кейин эса бу маблағларни хорижда, асосан Швейцарияда ювишда айбланган. 2018 йили Швейцария Каримованинг 555 миллион доллардан ортиқ маблағини мусодара қилганди.
Ўзбекистонда 2013 йилдан буён Каримовага нисбатан давлат маблағларини ўғирлаш, солиқ тўлашдан бўйин товлаш ва жиноий ҳамжамият ташкил этиш бўйича бир неча жиноий иш очилган. У бир қанча жазо, жумладан 13 йиллик қамоқ жазосини олган ва Тошкент яқинидаги аёллар қамоқхонасига юборилган.
