Нурали Алип кубок билан. spbdnevnik.ru сайти фотосурати
Санкт-Петербургнинг «Зенит» клуби ва Қозоғистон терма жамоаси ҳимоячиси Нурали Алип Россия кубоги суперфиналида Калининграднинг «Балтика» жамоасига қарши ўйинда ўз клубига ғалаба келтирган голни киритди. Учрашув 2:1 ҳисобида петербургликлар фойдасига ҳал бўлди.
Алип майдонга асосий таркибда кирди, бироқ 40-дақиқада «Балтика» ҳужумчиси Алекс Фернандеснинг гол уришига тўсқинлик қила олмади. «Зенит» асосий вақт тугашига атиги ўн дақиқа қолганида олдинга чиқди, Нино буни уддалади. 95-дақиқада эса рақиб учун кутилмаганда Алип ҳужумга қўшилди ва Андрей Мостовойнинг қанотдан оширган тўпини боши билан аниқ нишонга олди. Алип учун бу мавсумдаги биринчи ва ягона гол бўлди.
Алипнинг ўзи флеш-интервьюда бош мураббий ёрдамчиси Александр Анюков ўйин олдидан уни «бугун гол уриш учун охирги имконият» деб огоҳлантиргани ва Нурали бу имкониятдан унумли фойдаланиши кераклигини айтган, бу эса футболчини тез-тез ҳужумга қўшилишига туртки бўлган.
Байрам пайтида Алип кубокни нотўғри кўтарган, унинг қопқоғи тушиб кетган ва футболчининг бошига тушган, натижада футболчининг боши ёрилган. Шифокорлар футболчига шошилинч ёрдам кўрсатишга мажбур бўлишган.
«Мен қопқоқ кубок билан бирга бўлади деб ўйладим, лекин у маҳкамланмаган экан. Бирдан бошимга тушса бўладими... Аввалига ҳеч нарса бўлмади деб ўйладим, кейин қўлимга қарасам — қон, қон тизиллаб оқаётган эди. Бу жуда оғриқли кечди. Энди ёрилган жойни тиктиришга тўғри келади», — деди Алип «Матч ТВ» эфирида.
Бироқ, бу муаммо боши бинт билан ўралган футболчининг бир неча дақиқадан сўнг жамоаси билан ғалабани нишонлаш учун қайтишига тўсқинлик қилмади.
«Зенит» 2023/2024 йилги мавсумда треблга эришди — чемпионлик, Россия кубоги ва Суперкубогида ғалаба қозонди.
Эслатиб ўтамиз, Санкт-Петербург жамоаси сафида асли қирғизистонлик Илзат Ахметов ҳам бор. Россия кубогидаги бу ғалаба унинг фаолиятидаги биринчиси бўлди.
Нурали Алип Олмаотанинг «Қайрат» клуби тарбияланувчиси ҳисобланади. 2022 йили петербургликларнинг «Зенит» клубига ўтган. Ўшандан бери у жамоа билан уч марта Россия чемпиони бўлган. Қозоғистон терма жамоаси сафида 31 та ўйин ўтказган.
