Қозоғистон Мудофаа вазирлиги матбуот хизмати фотосурати
Каспий денгизида ҳалок бўлган қозоғистонлик ҳарбийлар билан боғлиқ жиноий иш бўйича гумонланувчилар аниқланди. Бу ҳақда Қозоғистон Бош прокуратураси хабар берди.
«Хизмат вазифаларига бепарволик билан муносабатда бўлган, шунингдек, метеорологик шароитларни инобатга олган ҳолда шахсий таркиб хавфсизлигини таъминлаш учун назоратни амалга оширмаган ва зарур чораларни кўрмаган, қутқарув ишларини лозим даражада ташкил этмаган ва бунинг оқибатида инсонлар ҳалок бўлишига сабаб бўлган мансабдор шахслар аниқланди», — дейилади тарқатилган хабарда.
Иш бўйича жами 30 нафардан ортиқ ҳарбий хизматчи сўроқ қилинган, ҳужжатлар ва видеоматериаллар олиб қўйилган, 12 та экспертиза тайинланган. Гумонланувчиларнинг фамилиялари ва аниқ лавозимлари хабарда келтирилмаган. Қўлга олинганлар ҳақида ҳам маълумот берилмаган.
Иш оғир оқибатларга олиб келган хизматга совуққонлик билан муносабатда бўлиш ва кемани бошқариш қоидаларини бузиш моддалари бўйича тергов қилинмоқда. Хизматга совуққонлик билан муносабатда бўлиш моддаси бўйича айбдорларга беш йилгача, кемани бошқариш қоидаларини бузиш бўйича эса етти йилгача озодликдан маҳрум қилиш жазоси тайинланиши мумкин.
Ҳукумат комиссияси раҳбари, Бош вазир ўринбосари Қанат Бозумбаев аввалроқ тергов ҳар томонлама ва холисона ўтказилишини маълум қилган эди. Унинг сўзларига кўра, хатти-ҳаракатлари ёки ҳаракатсизлиги фожиага сабаб бўлган мансабдор шахслар қонунга мувофиқ жазоланади.
Ҳалок бўлганларнинг оилаларига моддий ёрдам кўрсатилади. Давлатдан ташқари, бир қатор тадбиркорлар ва ташкилотлар ҳам молиявий ёрдам бериш истагини билдирган. «Кўплаб мурожаатлар муносабати билан» Манғистау вилояти ҳукумати ёрдам маблағларини йиғиш учун ягона оператор сифатида «Ұлттық рух» жамоат бирлашмасини белгилади ва фуқароларни фирибгарлардан эҳтиёт бўлишга чақирди.
Ҳодиса 24 сентябрь куни Каспий денгизининг Қозоғистон секторида Ҳарбий-денгиз кучларининг «Хазар қорғаны-2026» машғулотлари вақтида содир бўлган. Республика Мудофаа вазирлиги маълумотига кўра, об-ҳавонинг кескин ёмонлашиши ва кучли шамол туфайли ўқув-жанговар вазифани бажараётган бир гуруҳ ҳарбий хизматчилар денгизга оқиб кетган. Аниқлаштирилган маълумотларга кўра, сувга 17 киши тушиб кетган (аввалроқ 19 киши экани хабар қилинган). Улардан уч нафари қутқариб қолинган. Ҳозирга келиб, ҳалок бўлган 14 кишининг барчасининг жасади топилган.
Қозоғистон Мудофаа вазирлиги дастлаб 12 кишидан иборат рўйхатни эълон қилди:
1. катта лейтенант Мухтарули Олжас;
2. матрос Аяпберген Сержан Талгатули;
3. матрос Омирзак Омирбек Омирболатули;
4. матрос Кобенов Алмас Жусипули;
5. матрос Тўлеген Ақилбек Қабденули;
6. матрос Темиргалиев Женис Тлеушеевич;
7. матрос Бердиханов Мейрамбек Ермуханули;
8. матрос Жанабай Асет Саматули;
9. матрос Мадихан Азамат Болатбекули;
10. матрос Бегей Дастан Нурболули;
11. матрос Гилаж Ақжайиқ Болатбетули;
12. матрос Диханбаев Олжас Тажибайули.
Кейинроқ вазирлик сержант Гумаров Мансур ва матрос Турдибекули Мираснинг жасадлари ҳам топилганини маълум қилди. Ҳодиса жойидаги қидирув-қутқарув операцияси якунланган.
25 сентябрь куни Қозоғистонда Каспий денгизида ҳалок бўлган ҳарбийлар хотирасига умуммиллий мотам куни деб эълон қилинди.
