Арман Рамазонов. kaztag.kz сайти фотосурати
Остонанинг жиноят ишлари бўйича ихтисослаштирилган туманлараро суди ҳарбий маҳсулотлар харид қилиш вақтида маблағларни ўзлаштирганликда айбланган «Казспецэкспорт» республика давлат корхонаси раҳбарларига нисбатан ҳукм чиқарди. Хусусан, компания бош директори Арман Рамазонов 11 йилга озодликдан маҳрум этилди, деб хабар қилади Қозоғистон Молиявий мониторинг агентлиги (ММА) матбуот хизмати.
Бундан ташқари, давлат корхонасининг импорт департаменти директори Азат Кудабаев 10 йилга озодликдан маҳрум этилди. Қолган тўққиз айбланувчига турли хил қамоқ жазолари берилди, дея қўшимча қилди ММА.
Суд давлат манфаатларини кўзлаб, 1,6 миллиард тенге (тахминан 3 миллион доллар) даъвосини қаноатлантирди, шунингдек, судланувчилардан 607 миллион тенге (1,1 миллион доллар) қийматидаги мол-мулкни мусодара қилишга қарор қилди.
Ҳукм ҳали қонуний кучга кирмаган.
Агентликнинг эслатишича, 2023 йили хавфсизлик кучлари «Казспецэкспорт» ходимлари ва компания етказиб берувчиларини қўлга олган. Улар коррупция ва ҳарбий маҳсулотлар харид қилиш учун ажратилган бюджет маблағларини ўзлаштиришда гумон қилинган. Жиноят иши бўйича судланувчиларнинг ноқонуний ҳаракатларидан кўрилган зарар 1,6 миллиард тенгедан (3 миллион долларга яқин) ошгани аниқланган.
Ҳибсга олинганлар орасида компания директори Арман Рамазонов ҳам бўлган. Тергов маълумотларига кўра, корхона раҳбари ва унга алоқадор шахслар мудофаа буюртмаси доирасида қўшни давлатлардан олиб келинган ускуналар нархини ошириб кўрсатган.
Ўтган йил февраль ойида Рамазонов лавозимини вақтинча эгаллаб олган Аршат Аяганов ҳам коррупцияда айблангани хабар қилинган эди. Хусусан, у зирҳли ҳарбий техника етказиб бериш билан боғлиқ битимда мансаб ваколатларини суиистеъмол қилишда айбланган. КазТАГ агентлиги маълумотларига кўра, шу йилнинг январь ойида Аяганов 4 йилу 8 ойга озодликдан маҳрум этилган.
