«Росатом» матбуот хизмати фотосурати
«Росатом»нинг Машинасозлик бўлимига қарашли Санкт-Петербургдаги «АЭМ-Спецсталь» заводи мутахассислари Ўзбекистонда қурилиши режалаштирилган кам қувватли атом электр станцияси (ҚҚАЭС) учун РИТМ-200Н реактор ускунасини ишлаб чиқаришни бошлади. Бу ҳақда Россия корпорациясининг пресс-релизида сўз юритилган.
Қайд этилишича, металлурглар Ўзбекистон АЭСи реакторининг корпус фланцини (корпусни блокнинг юқори қопқоғи билан боғловчи элемент) яратиш учун оғирлиги 205 тонна бўлган махсус легирланган пўлатдан қуйма қуйган.
«Росатом» маълумотларига кўра, биринчи ускунанинг ишлаб чиқарилиши тақдимоти Power Uzbekistan-2025 халқаро кўргазмасида бўлиб ўтган, унда энергетика соҳаси мутахассислари, жумладан, тегишли вазирлик ва идоралар раҳбарлари йиғилган.
Корпорация матбуот хизматининг қўшимча қилишича, пўлат қуйиш ядро реакторини яратиш жараёнининг ҳақиқий бошланиши ҳисобланади. Металлургия заводида барча технологик операциялар бажарилгандан сўнг, реактор ускуналари корпусини ягона блокга йиғиш учун бўлинманинг бошқа корхоналарига берилади.
«Машинасозлик бўлими корхоналари музёрар флотида бир неча йиллардан бери қўлланилаётган РИТМ серияли реактор блокларини ишлаб чиқариш бўйича зарур қувват ва тажрибага эга. Бизнинг билим ва тажрибамиз Ўзбекистондаги КҚАЭС учун барча олтита РИТМ-200Н реактор блокларини ишлаб чиқаришда қўлланилади», — дея таъкидлади «Росатом»нинг Машинасозлик бўлими раҳбари Игорь Котов.
ℹ️ Ўзбекистон ва Россия ўртасида атом энергетикаси соҳасидаги ҳамкорлик, жумладан, Ўзбекистондаги биринчи АЭС қурилиши тўғрисидаги битим 2017 йил декабрида имзоланган эди. Қиймати 11 миллиард доллар бўлган биринчи энергия блоки 2028 йили ишга туширилиши режалаштирилган.
«Росатом» билан кичик АЭСни лойиҳалаш, етказиб бериш ва қуриш бўйича янги шартнома 2024 йил 27 май куни Тошкентда Россия президенти Владимир Путиннинг давлат ташрифи доирасида имзоланган эди.
Ўзбекистондаги кичик АЭС атом музёрар кемаларида қўлланилган ва денгизда фойдаланиш учун амалиётда исботланган РИТМ-200 сувли ядро реакторига асосланган. Бироқ, мазкур реакторларга эга АЭС қуруқликда ҳали қурилмаган ва шунинг учун у тўлиқ референтли ҳисобланмайди.
«Ўзатом» раҳбари Азим Ахмедхаджаев «Ўзбекистон ушбу технологияни синовдан ўтказувчи майдонга айланмайдими?» деган саволга, бундай хавф йўқ, чунки технологиялар «ер устида ишлашга мослаштирилган, ишлаш принципи эса ўзгармаган», дея жавоб берган.
