Талабалар билан учрашув. Ўзбекистон президенти матбуот хизмати фотосурати
Ўзбекистон президенти Шавкат Мирзиёев мутасаддиларга 2025 йилгача дори воситалари ишлаб чиқаришни икки баравар ошириш дастурини ишлаб чиқиш, бунинг эвазига мамлакатда кенг истеъмол қилинадиган 200 турдаги дори воситаларини ўзлаштириш ҳамда ишлаб чиқариш бўйича топшириқ берди. Бундай лойиҳаларни амалга ошириш учун давлат томонидан 400 миллион доллар ажратилади, деди республика раҳбари Tashkent Pharma Park кластери инновацион кластерида фармацевтика соҳасидаги корхоналар раҳбарлари билан учрашувда.
Юқорида қайд этилган дастур Фармацевтика тармоғини ривожлантириш агентлиги ва «Асакабанк» томонидан ишлаб чиқилиб, соҳадаги йирик корхоналар билан биргаликда чора-тадбирлар режаси тузилади.
Энди фармацевтика тармоғида Илғор лойиҳалар инвестиция жамғармаси ташкил қилинади. Бу жамғарма биофармацевтика, ҳужайра технологиялари, онкология каби йўналишлардаги лойиҳаларга улуш билан киради, уларга катализатор бўлади. Бизнесга ёрдам «Асакабанк» томонидан ҳам кўрсатилади, Тикланиш ва тараққиёт жамғармаси унга 100 миллион АҚШ доллари миқдорида кредит линияси очади. «Асакабанк» томонидан фармацевтика соҳасида янги ишланмаларни тижоратлаштириш ва стартап лойиҳаларни молиялаштириш учун 10 миллион долларлик венчур компания очилади.
Мирзиёев, шунингдек
маҳаллий фармацевтика корхоналари учун 2025 йил 1 январда тугайдиган божхона имтиёзларининг амал қилиш муддати яна уч йилга узайтирилишини маълум қилди.
Хорижий компаниялар рецептлари асосида дори воситаларини ишлаб чиқариш ҳуқуқини берувчи ҳужжатларни расмийлаштириш тартибини соддалаштириш бўйича кўрсатмалар берилди. Бундан ташқари, маҳаллий ишбилармонларнинг АҚШ озиқ-овқат ва фармацевтика идораси ва Европа дори-дармон агентлигидан сертификат олиш харажатлари республика бюджети ҳисобидан қопланади.
Умуман, фармацевтикада 1 миллиард долларлик лойиҳалар шакллантирилиши белгиланди. Улар талаб юқори дори воситаларини чет элникидек сифатда ишлаб чиқариб, бозорда рақобат яратиб, нархларни арзонлаштиришга қаратилган.
Президентнинг тадбиркорлар билан учрашувида бугунги кунда Ўзбекистонда 3,5 минг турдаги дори воситалари ва тиббиёт буюмлари ишлаб чиқарилаётгани таъкидланди. Аммо бу аҳоли талабини қондириш учун етарли эмас, шу боис Мирзиёев соҳани ривожлантириш дастурини ишлаб чиқишни буюрди.
Президент 2020 йили қуриш тўғрисида қарор қабул қилинган Tashkent Pharma Park инновацион илмий-ишлаб чиқариш кластери фаолияти билан атрофлича танишди, деб хабар беради давлат раҳбари матбуот хизмати. Бугунги кунда маъмурий марказ қуриб битказилган. 11 қаватли ушбу бинода Фармацевтика тармоғини ривожлантириш агентлиги, конференция зали, коворкинг маркази, бизнес инкубатор, кутубхона, соҳа тарихи музейи жойлашган.
Унинг ҳудудида 40 миллион долларлик Grand Pharma Logistics Hub дистрибьютор маркази ҳам иш бошлади, омборхоналар, меҳмонхона ва ётоқхона қурилди, 300 та иш ўрни яратилди.
Келгусида саноат зонасида яна 620 миллион долларлик 20 та лойиҳа амалга оширилиши мўлжалланган.
Бундан ташқари, Tashkent Pharma Park таркибига кирувчи Фармацевтика техника университети ҳам илк талабаларни қабул қилди. Таъкидланишича, университет битирувчиларига Ёнсе (Жанубий Корея), Сандерленд ва Де Монтфорт (Буюк Британия) университетларининг халқаро миқёсда тан олинадиган дипломлари берилади.
