Шерзод Эсанов. "Акрон" матбуот хизмати фотосурати
«Акрон» (Тольятти) футбол клуби ўзбекистонлик ярим ҳимоячи Шерзод Эсановнинг жамоани тарк этганини эълон қилди. Шу тариқа, Россия профессионал клубларида Ўзбекистон фуқаролигига эга бирорта ҳам футболчи қолмади.
Эсанов ўтган ёзда «Акрон» билан шартнома имзолаган эди. У жамоа сафида барча турнирларда 16та ўйин ўтказиб, битта гол урган. Бироқ, у жамоада ўз ўрнини топа олмаган ва шартномаси бекор қилинган.
Ўзбекистонлик Аббос Файзуллаев ҳамон Москванинг ЦСКА клуби футболчиси сифатида қайд этилган, бироқ унинг Туркиянинг «Истанбул Башакшеҳир» клубига 7,5 миллион евро эвазига ўтгани аллақачон якунланган келишув ҳисобланади, футболчининг ўзи эса Истанбулга етиб келган ва тиббий кўрикдан ўтмоқда. Шу тариқа, Эсанов РПЛдаги сўнгги ўзбек футболчиси эди.
Эслатиб ўтамиз, ўтган мавсумда РПЛ клублар рўйхатида Ўзбекистондан 5 нафар футболчи бор эди.
РПЛдан ташқари Россия чемпионатининг иккинчи кучли дивизиони – Биринчи лигада (собиқ ФНЛ) кетма-кет иккинчи йил бирорта ҳам ўзбекистонлик йўқ.
1992 йили мустақил Россия чемпионати пайдо бўлганидан бери биринчи марта ноёб вазият вужудга келмоқда. 33 йил давомида камида 3 нафар ўзбекистонлик футболчи Россия клубларида тўп сурган. Минимал кўрсаткич 1997 йили қайд этилган. Кейин Сергей Лусчан ва Андрей Резанцев (иккаласи «Крыля Советов»да) олий лигада, Максим Шацких («Лада») эса иккинчи дивизионда ўйнаганди.
Айни дамда РПЛ клублар рўйхатида Қозоғистон, Тожикистон ва Туркманистон вакиллари, Биринчи лигада Қирғизистон ва Тожикистон футболчилари бор.
