ulysmedia.kz сайти фотосурати
Қозоғистоннинг маъмурий ишлар бўйича Кассация суди аввалги инстанция судларининг чеченистонлик фаол Мансур Мовлаевга қочқин мақомини беришни рад этган қарорларини ўзгаришсиз қолдирди. Бу ҳақда «Новая газета Европа» Мовлаевнинг адвокати Вадим Дроздовга таяниб хабар берди.
Ҳуқуқшуноснинг сўзларига кўра, суд биринчи ва апелляция инстанциялари судлари қарорларида қоидабузарлик ёки хатоларни аниқламаган. Бундан ташқари, суд Мовлаев Россияга қайтарилган тақдирда шахсан таъқиб қилиниши хавфи мавжудлигини гўёки исботламаган, деган хулосага ҳам қўшилган.
«Амалий нуқтаи назардан бу Мансурнинг Россияга амалда топшириб юборилиши хавфи сезиларли даражада ошганини англатади», — деди Дроздов.
Мовлаев Рамзан Қодиров режимига қарши чиқувчи «Адат» мухолифат ҳаракати иштирокчиси. 2020 йилда Россияда Мовлаев гиёҳванд моддаларнинг ноқонуний муомаласи айблови билан судланган. Бироқ, чеченистонлик фаоллар Иброҳим ва Байсангур Янгулбаевлар жиноят иши сохталаштирилганини таъкидламоқда.
2022 йилда муддатидан илгари шартли озод қилинганидан сўнг, Мовлаевнинг таъкидлашича, уни Чеченистон полиция ходимлари ўғирлаб кетган ва махфий қамоқхонада ушлаб турган. Кейинроқ у Қирғизистонга қочишга муваффақ бўлган, сўнгра экстрадиция қилинишидан хавфсираб мамлакатни тарк этган. Қочиб кетганидан сўнг Мовлаев Олмаотада жойлашиб, мураббий бўлиб ишлаган. Айни пайтда Россияда фаол экстремизм иши бўйича федерал қидирувга берилган.
2025 йил май ойида фаол Россия сўровига асосан Олмаотада қўлга олинган. 2026 йил январь ойида Қозоғистон Бош прокуратураси уни экстрадиция қилиш ҳақидаги сўровни қаноатлантирган. 23 февраль куни БМТнинг Инсон ҳуқуқлари бўйича қўмитаси Мовлаевнинг шикоятини рўйхатга олган ва иш кўриб чиқилиши якунлангунга қадар Қозоғистонга уни экстрадиция қилишдан тийилишни тавсия қилган.
Қозоғистонда экстрадиция мақсадида қамоқда россиялик фаол Юлия Емельянова ҳам сақланмоқда. Февраль ойида республика Бош прокуратураси Россиянинг уни топшириш ҳақидаги сўровини қаноатлантирган, бироқ Емельянова бошпана бериш рад этилгани устидан шикоят қилган. Май ойида суд унга бошпана беришни яна бир бор рад этди. Ҳозир у ҳам Мовлаев каби Олмаота шаҳридаги СИЗОда сақланмоқда.
