Дональд Трамп. Видеодан кадр
АҚШ президенти Дональд Трамп Эрон билан савдо қилувчи мамлакатларга 25% тариф жорий этишини эълон қилди. Бу ҳақда у 12 январь куни ўзининг Truth Social ижтимоий тармоғидаги аккаунтида маълум қилди, деб хабар беради Bloomberg.
«Эрон Ислом Республикаси билан бизнес юритаётган ҳар қандай давлат Америка Қўшма Штатлари билан амалга оширилаётган ҳар қандай бизнесга 25% тариф тўлайди. Бу буйруқ якуний ва қайта кўриб чиқилмайди», — деди Трамп.
У янги тариф «дарҳол кучга киришини» қўшимча қилди, аммо амалга ошириш кўлами ёки усули ҳақида батафсил маълумот бермади.
Ўша куни эрталаб АҚШнинг Эрондаги воқеаларга муносабати ҳақида изоҳ бераркан, Оқ уй матбуот котиби Керолин Левитт Трамп ҳар қандай чоралар кўришга тайёр эканини, аммо можарони ҳал қилиш учун дипломатик воситаларга устувор аҳамият беришини айтди.
Bloomberg агентлигининг таъкидлашича, янги тарифнинг жорий этилиши АҚШ Олий суди томонидан тўхтатилиши мумкин, у чоршанба, яъни 14 январь куни Трампнинг глобал тарифларининг қонунийлигини кўриб чиқади.
Эроннинг бизнес шериклари қаторига Ҳиндистон, Туркия ва Хитой каби йирик иқтисодиётга эга кўплаб мамлакатлар киради. Хусусан, Хитой Эрон нефтининг дунёдаги энг йирик харидори ҳисобланади ва мамлакатнинг мустақил нефтни қайта ишлаш заводлари декабрь ойида харидларини кўпайтирди.
Эрон билан Марказий Осиё мамлакатлари ҳам савдо қилади. 2024 йили Эроннинг Қозоғистон билан савдо айланмаси 340 миллион долларни, Қирғизистон билан 58,5 миллион долларни, Тожикистон билан 377,7 миллион долларни, Туркманистон билан тахминан 600 миллион долларни ва Ўзбекистон билан қарийб 500 миллион долларни ташкил этган. 2025 йилда минтақа мамлакатлари Эрон билан яқин келажакда савдони 2-3 миллиард долларгача оширишга келишиб олганлар. Жумладан, май ойида бўлиб ўтган Ўзбекистон-Эрон бизнес форумидан сўнг икки мамлакат вакиллари 1 миллиард долларлик шартномаларни имзолаганлар.
ℹ️ 2025 йил апрель ойида Трамп Қўшма Штатларга импорт қилинадиган товарларга тариф ставкаларини оширди. Ўзбекистон, Қирғизистон, Тожикистон ва Туркманистондан келтирилган маҳсулотлар учун тариф 10% миқдорида белгиланди — бу Америка товарлари импортига паритет тарифини қўллайдиган мамлакатларга қўлланиладиган асосий тариф. Қозоғистондан келтирилган товарларга 27% тариф қўлланилди, чунки ушбу мамлакат Америка импортига нисбатан 54% тариф ўрнатган.
