Туркманистон Давлат миграция хизмати (ДМХ) электрон визалар тизими ва хорижий фуқароларни онлайн рўйхатдан ўтказиш порталини ишга туширди. Бу ҳақда Turkmenistaninfo хабар берди.
Янги рақамли хизматлар тақдимоти ДМХда бўлиб ўтди. Унда Туркманистонда аккредитациядан ўтган хорижий дипломатик ваколатхоналар раҳбарлари иштирок этди. Туркманистоннинг хориждаги элчилари тадбирга видеомулоқот орқали қўшилди.
Электрон визалар тизими migration.gov.tm портали асосида ишлайди. У орқали хорижликлар мамлакатга кириш учун рухсатнома олишга зарур ҳужжатларни интернет орқали юборишлари мумкин. Миграция хизматининг расмий портали идоранинг алоҳида рақамли хизмати сифатида фаолият юритади.
Бундан ташқари, хорижий фуқароларни онлайн рўйхатдан ўтказиш учун мўлжалланган rgstr.migration.gov.tm сайти ишга туширилди. У орқали сайёҳлар, тадбиркорлар ва дипломатлар миграция ҳисобига қўйилиш учун ҳужжатларни онлайн тарзда топширишлари мумкин.
Ҳокимият органлари миграция жараёнларини электрон шаклга ўтказиш ҳужжатларни расмийлаштириш муддатларини қисқартириши ва қоғозбозлик ҳажмини камайтиришини кутмоқда.
Электрон виза жорий этилгунга қадар Туркманистонга сайёҳлик сафари учун чет элликлар, қоида тариқасида, аввал қабул қилувчи томон ёки туроператор орқали таклифнома олишлари, сўнгра виза расмийлаштиришлари талаб этиларди. 2025 йил апрель ойида «Миграция тўғрисида»ги қонунга ўзгартишлар киритилди. Унга кўра, электрон виза олиш учун таклифнома талаб қилинмайди.
Шу билан бирга, ҳозирча ҳокимият органлари янги тизимнинг ишлаш шартларини, жумладан, e-Visa нархи, аризаларни кўриб чиқиш муддатлари ва зарур ҳужжатларнинг тўлиқ рўйхатини очиқ тарзда эълон қилмаган.
