www.gov.kz сайти фотосурати
Қозоғистон Савдо вазирлиги Қишлоқ хўжалиги вазирлиги билан биргаликда гўшт бозорида савдо устамасига риоя этилишини назорат қилувчи мониторинг гуруҳларини тузмоқда, деб хабар қилди вазирлик матбуот хизмати.
Савдо вазирлиги ҳукумат томонидан ижтимоий аҳамиятга эга товарларга 15 фоизлик товар устамаси белгиланганини қайд этди. Нархларни оширган дўконлар ва савдо тармоқлари жаримага тортилади. «Бугунги кунга қадар ижтимоий аҳамиятга молик мол гўштига рухсат этилган устама меъёридан ошиб кетганлиги бўйича 45 та буйруқ чиқарилган бўлиб, улардан 33 таси жарима ҳисобланади», — дейилади вазирлик хабарида.
Қозоғистонда мол гўшти нархи сезиларли даражада ошгани ҳақидаги хабарлар ўтган баҳорда бошланган; июль ойининг охирига келиб, бу турдаги гўштнинг бир килограмми нархи 5 минг тенгега (тахминан 9 доллар) етди. Ҳозирги вақтда Савдо вазирлиги маълумотларига кўра, мол гўшти ижтимоий аҳамиятга молик маҳсулотлар орасида нарх динамикасига энг катта таъсир кўрсатяпти.
«Ушбу маҳсулот анъанавий равишда истеъмол саватчасининг муҳим қисмини эгаллайди ва нархларнинг ўзгариши уй хўжаликлари бюджети учун катта аҳамиятга эга. Айниқса, бу ижтимоий аҳамиятга молик товарлар рўйхатига киритилган ва барқарор истеъмол талабига эга бўлган елкама-кўкрак мол гўштига тегишли эканлигини таъкидлаш керак. Озиқ-овқат маҳсулотлари орасида у умумий истеъмол инфляциясига таъсир кўрсатиш бўйича биринчи ўринни эгаллайди. Йил бошидан буён гўштга бўлган нарх индекси қарийб 25 фоизни, ижтимоий аҳамиятга молик товарлар рўйхатига киритилган чўчқа гўшти бўйича эса 23,6 фоизни ташкил этди», — дейилади вазирлик хабарида.
