hajj.ir сайти фотосурати
Саудия Арабистони ҳукумати Ҳаж зиёратига келувчи хорижликлар учун янги қоидаларни жорий қилди. Низомга кўра, 29 апрелдан бошлаб улар муқаддас қадамжоларга фақат зиёратчилар визаси бўлган тақдирдагина бора оладилар, дея хабар беради «Азия-Плюс» нашри Тожикистон Дин ишлари бўйича қўмитасига таяниб.
Қўмитанинг аниқлик киритишича, илгари зиёратчилар Саудия Арабистонига учинчи мамлакатлардаги сайёҳлик компаниялари орқали олдиндан, масалан, Ҳаж бошланишидан бир ой олдин боришлари мумкин бўлган. Шундай қилиб, улар моҳиятан мусулмонларнинг муқаддас қадамжоларини ноқонуний зиёрат қилишган. Энди Араб давлати Ички ишлар вазирлиги Макка ва Мадинага фақат зиёрат визаси бўлгандагина киришга рухсат берилишини маълум қилди.
Қўмита таъкидлашича, кўпчилик тожикистонликлар умрага Ўзбекистон ва Россия орқали боришни маъқул кўришади ва кейин Саудия Арабистонида асосий ҳаж даври бошланишини кутишади. Қайд этилишича, бундай зиёрат фуқаролар учун ўз юртидан парвоз қилишга қараганда арзонроқ тушган. Бундан буён бундай маршрут ва ҳатто сайёҳлик ёки бизнес визаси билан ҳам диндорларга зиёрат қилишга рухсат берилмайди ва жазо чоралари қўлланилади.
Хусусан, янги қоидаларга кўра, қоидабузарлар жаримага тортилади, олти ойга ҳибсга олинади ва Саудия Арабистонидан ўн йилга қиролликка кириш тақиқланган ҳолда депортация қилинади.
Аммо шуни таъкидлаш лозим, қоидалар фақат Ҳажга тегишли, яъни Умра зиёратини керакли рухсатномаларсиз адо этиш мумкин.
Тожикистон Дин ишлари бўйича қўмитаси диндорларни муаммога дуч келмаслик учун бу йил чет эл сайёҳлик агентликлари хизматларидан фойдаланмасликка қатъий чақиради.
ℹ️ 2025 йилги Ҳаж мавсуми май ойининг ўрталарида бошланиб, июнь ойининг охиригача давом этади. Бу сафар Саудия Арабистони Тожикистонга 7000 нафар зиёратчи учун квота ажратган. Маълумки, Ҳаж сафари нархи 56 800 сомони (тахминан 5 300 доллар)ни ташкил қилади.
