mk-ek.ru сайти фотосурати
Шифокорлар, ўқитувчилар, журналистлар, тракторчи ва бошқа бир қатор тоифадаги ишчилар Россияда малакали чет эл мутахассислари сифатида яшаш рухсатномасини (ВНЖ) соддалаштирилган тартибда олиш имконини берувчи касблар рўйхатидан чиқарилди. Меҳнат ва аҳолини ижтимоий муҳофаза қилиш вазирлигининг тегишли буйруғи ҳуқуқий ахборот интернет-порталида эълон қилинди.
Рўйхат 203 та касбдан 29 тага қисқартирилган.
Унда турли ихтисосликдаги инженерлар ва монтажчилар, йирик маълумотлар таҳлилчиси, дастурчи, металл кема корпусини йиғувчи, гидропресс оператори, ҳимоя қопламаларини қўллаш оператори, контактли пайвандлаш дастгоҳларидаги пайвандчи, кема корпусини таъмирловчи уста, кема қувурлари монтажчиси, кема электромонтёри касблари қолган.
Буйруқ лойиҳасини март ойида тақдим этаркан, Меҳнат вазирлиги матбуот хизмати янги рўйхат кадрларга бўлган эҳтиёж прогнози асосида тузилганини таъкидлаган, уни ишлаб чиқишда манфаатдор вазирликлар, йирик давлат корпорациялари ва компаниялари, шунингдек, Стратегик ташаббуслар агентлиги иштирок этган. Рўйхатнинг қоралама вариантида 31 та мутахассислик кўрсатилган.
Меҳнат вазирлигининг тушунтиришича, 2025 йили соддалаштирилган тартибда яшаш рухсатномасини олиш ҳуқуқидан фойдаланиш учун тегишли касбга эга чет эллик мутахассислар бир қатор мезонларга жавоб беришлари керак. Шу жумладан, ариза берилган санада рўйхатдаги касб бўйича камида бир йиллик узлуксиз иш тажрибасига эга бўлиши ва Россия қонунчилигининг барча талабларига жавоб бериши лозим.
ℹ️ 2017 йилдан 2023 йилгача Россия меҳнат бозорида талабгир касбларга эга хорижликлар соддалаштирилган тартибда фуқароликни олиш ҳуқуқига эга бўлганлар. Россия ИИВ маълумотларига кўра, россиялик бўлган хорижликларнинг 1% дан камроғи мазкур ҳуқуқдан фойдаланган. 2023 йил апрель ойида ушбу қоида Меҳнат вазирлигининг тегишли буйруғи билан бекор қилинди. 2024 йил декабрь ойида «Россия Федерациясида чет эл фуқароларининг ҳуқуқий мақоми тўғрисида»ги қонунга талабгир касбларга эга бўлган чет элликлар ва фуқаролиги бўлмаган шахсларга яшаш рухсатномаси олишнинг соддалаштирилган тартибидан фойдаланиш ҳуқуқини берувчи ўзгартиришлар киритилганди. Бундай касблар рўйхатини аниқлаш РФ Меҳнат вазирлиги зиммасига юклатилган.
