Курбан Бердиев. gameleaks.ru сайти фотосурати
Туркманистон ва россиялик мутахассис Қурбон Бердиев «Сочи» футбол клуби бош мураббийлигидан кетди. Бу ҳақда жамоа матбуот хизмати хабар берди.
Бердиев Россия Премер-лигасининг 22-турида «Сочи»нинг Самаранинг «Крылья Советов» жамоасига қарши ўз уйида 1:2 ҳисобида мағлубиятга учраганидан сўнг истеъфога чиқарилди. Дмитрий Хохлов бош мураббий вазифасини бажарувчи этиб тайинланди.
Қурбон Бердиев ўтган йилнинг декабрь ойидан бошлаб «Сочи»ни бошқарган, шу сабаб мутахассис Эроннинг «Терактор Сази» клуби билан шартномани зудлик билан бекор қилганди. Бердиев бошчилигида «Сочи» бор-йўғи бешта расмий ўйин ўтказди, шундан учтаси жамоанинг мағлубияти билан якунланди, иккитаси ҳалокатли ҳисоб билан якунланди («Оренбург»га 0:4 ва Воронежнинг «Факел»ига қарши 0:3). Шу билан бирга, сочиликлар Москванинг ЦСКА (2:0) ва «Динамо» (2:0) клубларини мағлуб этишга муваффақ бўлишди.
Бердиев «Сочи» билан икки ярим йил муддатга шартнома имзолаган, бироқ бор-йўғи 106 кун ишлади.
22 турдан кейин «Сочи» 31 очко билан турнир жадвалида 9-ўринда бормоқда.
Бердиев фаолиятини қаерда давом эттириши ҳозирча номалум. Балки у Эронга қайтар, у ерда мухлислар у ҳақида яхши фикрда. Мутахассиснинг ўз ватанига, Туркманистонга қайтиб, янги ташкил этилган «Аркадаг» ФК, шунингдек, республика терма жамоасини бошқариши эҳтимоли ҳам бор.
Қурбон Бердиев асли ашхободлик. Футболчи сифатида Ашхободнинг «Колхозчи»си ва Олма-Отанинг «Қайрат» жамоаларида энг муваффақиятли ўйнаган. 90-йиллари у икки марта Олма-Ота клубини бошқарган, Қозоғистон чемпионлигини қўлга киритган. Туркманистон терма жамоаси билан ишлаган. 2004 йилдан 2017 йилгача тўрт йиллик танаффус билан Қозоннинг «Рубин» клуби вице-президенти лавозимида ишлаган. Шунингдек, у «Рубин»ни бошқарган ва уни икки марта Россия чемпионатига олиб чиққан, бир марта кубок ва икки марта мамлакат Суперкубогини қўлга киритган. Бердиев бошчилигида илк бор «Ростов» Россия чемпионатининг кумуш медалини қўлга киритган ва Чемпионлар лигасининг гуруҳ босқичига йўл олган.
У 2021 йили «Қайрат»га Кузатув кенгаши раиси маслаҳатчиси сифатида қайтган, кейин эса жамоанинг асосий таркибини бошқарган. Унинг қўл остида «Қайрат» мамлакат кубогини қўлга киритди ва илк бор еврокубокларнинг гуруҳ босқичига йўл олди. Унинг қўл остида олмаоталиклар Қозоғистон чемпионатининг бронза медалини қўлга киритишди. 2022 йилнинг июнь ойида Олма-Ата клубини тарк этгач, у Эроннинг «Терактор Сази» клубини бошқарган ва у билан олти ойдан кам вақт ишлаган.
