Шавкат Мирзиёев. Ўзбекистон президенти матбуот хизмати фотоси
Ўзбекистон президенти Шавкат Мирзиёев Марказий Осиё давлатлари раҳбариятига минтақавий Иқлим интеграцияси моделини ривожлантиришни таклиф қилди. Давлат раҳбарининг таъкидлашича, фақат биргаликдаги ҳаракатлар орқали музликларнинг эриши, сув тақчиллиги ва кучли қурғоқчилик каби таҳдидларга самарали қарши туриш мумкин. Ушбу ташаббус Туркиянинг Анталия шаҳрида бўлиб ўтган БМТнинг Иқлим ўзгариши тўғрисидаги доиравий конвенцияси (COP31) томонлари конференциясида илгари сурилди, дея хабар беради Ўзбекистон етакчисининг матбуот хизмати.
Ўзбекистон раҳбари минтақавий Иқлим интеграцияси модели доирасидаги ҳамкорликни учта асосий йўналишдан бошлаш мақсадга мувофиқлигини қайд этди.
Улардан биринчиси — ахборот йўналишидир. Бунда Бутунжаҳон метеорология ташкилоти кўмагида иқлим хавфлари тўғрисида маълумот алмашиш инфратузилмасини яратиш таклиф этилмоқда.
Иккинчи йўналиш — технологик йўналиш. Мирзиёев «Eco Expo» кўргазмасини Марказий Осиё воқелигига мослаштирилган замонавий экологик ечимлар учун доимий инвестициявий-технологик майдончага айлантиришга тайёрлигини билдирди.
Учинчиси — молиявий йўналиш. Бу борада тараққиёт банклари ва мақсадли жамғармалар билан биргаликда қўллаб-қувватлашнинг янги воситаларини, жумладан, имтиёзли грантлар, шунингдек, «кўк» ва «арид» молиялаштириш механизмларини ишлаб чиқиш зарур.
Ўз чиқишида республика президенти Ўзбекистон иқлим ўзгаришига қарши кураш бўйича глобал саъй-ҳаракатларни қўллаб-қувватлашини ҳамда мамлакатнинг ривожланиш моделини табиатдан оқилона фойдаланиш ва «яшил» технологиялар негизида қураётганини таъкидлади.
Мирзиёев, шунингдек, саммит иштирокчиларини миллий миқёсда кўрилаётган чора-тадбирлар билан таништирди. Хусусан, углерод сиғимини камайтириш доирасида ялпи ички маҳсулот бирлигига тўғри келадиган чиқиндилар ҳажмини 35 фоизга қисқартириш мақсади муддатидан олдин бажарилди. 2035 йилга бориб бу кўрсаткични 50 фоизга етказиш бўйича янги вазифа белгиланди.
Шу билан бирга, сўнгги ўн йил ичида иқтисодиётнинг сув сиғими қарийб икки баробар, сув олиш ҳажми эса бешдан бир қисмга қисқарди. Бугунги кунда сув тежовчи технологияларни жорий этиш суғориладиган майдонларнинг 60 фоиздан ортиғини қамраб олмоқда.
Ерларни қайта тиклаш бўйича фаол ишлар олиб борилмоқда, бунинг шарофати билан ўрмонзорлар майдони 6 миллион гектарга кенгайди, уларнинг учдан бир қисми Оролбўйи ҳудудига тўғри келади.
Шунингдек, Чиқиндилар билан ишлаш стратегияси бандлари амалга оширилмоқда.
Президент олиб борилаётган сиёсат марказида ёш авлод ҳақида ғамхўрлик қилиш турганига алоҳида эътибор қаратди.
«Мамлакатимизда болаларнинг экологик тарбияси оила, маҳалла ва мактабдан бошланади. Биз болаликдан сувни асрашга, дарахтларни парваришлашга, умумий муҳитнинг тозалиги ҳақида қайғуришга ўргатамиз», — деди Мирзиёев.
У Ўзбекистон аҳолисининг ҳар бешинчи нафари мактаб ўқувчиси ёки талаба эканини қўшимча қилди. Демак, 2050 йилга бориб аҳолининг тўртдан уч қисми табиатга йўналтирилган таълим олган бўлади.
ℹ️ БМТнинг Иқлим ўзгариши тўғрисидаги доиравий конвенцияси (COP31) томонлари конференциясининг 31-сессияси доирасидаги дунё етакчилари саммити 10-11 ноябрь кунлари Анталия шаҳрида бўлиб ўтди. Тадбирда 90 дан ортиқ давлат ва ҳукумат раҳбарлари, етакчи халқаро ташкилотлар ва молия институтлари раҳбарлари иштирок этди.
Ўзбекистон президенти Шавкат Мирзиёевнинг икки томонлама учрашувлар дастури сермазмун бўлди. Хусусан, саммит доирасида у Грузия, Финляндия, Словения, Бангладеш, Саудия Арабистони каби давлатлар раҳбарияти, шунингдек, Яшил иқлим жамғармаси, Европа тикланиш ва тараққиёт банки, Бутунжаҳон метеорология ташкилоти, Жаҳон банки, БМТ Тараққиёт дастури вакиллари билан музокаралар ўтказди.
