Андрей Мартин. «Ўрдабоси» ФК фотоси
Чимкентнинг «Ўрдабоси» футбол клуби ўз тарихида илк бор жамоа билан бир мавсумда Қозоғистон чемпионати ва Кубогини қўлга киритган бош мураббий Андрей Мартин билан шартномани узайтирмади. Бу ҳақда инсайдер Иван Карпов хабар берди.
Блогер маълумотларига кўра, 9 ноябрь куни Мартин клуб раҳбарияти билан учрашган. Музокаралар якунида томонлар ҳамкорликни тўхтатишга қарор қилган, шартномани узайтириш бўйича янги мулоқотлар режалаштирилмаган. «Ўрдабоси»нинг расмий баёноти тез орада эълон қилиниши кутилмоқда.
Эльдар Аманбаев берган хабарга қараганда, «Ўрдабоси» раҳбарияти олдига нафақат чемпионлик унвонини сақлаб қолиш, балки жамоани еврокубокларнинг асосий босқичига олиб чиқиш вазифаси қўйиладиган янги мураббий таклиф этиш ниятида.
Ўз навбатида, ASnews.kz нашри хайрлашувга Мартин ва раҳбарият ўртасида жамоани шакллантириш масалаларидаги келишмовчиликлар сабаб бўлганини таъкидламоқда. Нашр маълумотига кўра, клуб менежменти мураббийнинг трансфер сиёсатига аралашувидан норози бўлган. Ушбу хабарнинг расмий тасдиғи йўқ.
Мартин «Ўрдабоси»ни 2024 йил декабрида қабул қилиб олган эди. Унинг бошқарувидаги илк мавсумда жамоа Қозоғистон чемпионатида еттинчи ўринни эгаллади. Бироқ 2026 йилда чимкентликлар 68 очко жамғариб, Олмаотанинг «Қайрат» клубидан уч очко илгарилаб кетди ва ўз тарихидаги иккинчи чемпионлик титулини қўлга киритди.
7 ноябрь куни «Ўрдабоси» Қозоғистон Кубоги финалида Қизилўрданинг «Қайсар» жамоасини 4:1 ҳисобида тор-мор этди. Бу клуб тарихидаги учинчи миллий кубок ҳамда чимкентликлар бир мавсумда ҳар иккала асосий миллий совринни ютиб олган илк ҳолат бўлди.
Мартин учун бу муваффақият уч мавсум ичидаги иккинчи олтин дубл бўлди. 2023/24 йилги мавсумда у «Петрокуб» билан Молдова чемпионати ва Кубогида зафар қучган, сўнгра жамоани Конференциялар лигасининг асосий босқичига олиб чиққан эди.
Бундан сал аввал «Ўрдабоси»нинг чемпионлик пойгасидаги асосий рақиби бўлмиш «Қайрат» ҳам мураббийни алмаштирганди. 26 октябрь куни олмаоталиклар бош мураббийи Рафаэль Уразбахтин ўз ташаббуси билан истеъфога чиқди ва клуб раҳбарияти унинг аризасини қабул қилди. Уразбахтин жамоани 2024 йил сентябридан бери бошқариб келаётган эди. Унинг қўл остида «Қайрат» икки марта Қозоғистон чемпиони бўлди, мамлакат Суперкубогини қўлга киритди ва ўз тарихида илк бор Чемпионлар лигасининг асосий босқичига йўл олди.
