Ўзбекистон президенти матбуот хизмати фотосурати
Ўзбекистон президенти Шавкат Мирзиёев Қашқадарё вилояти учун умумий қиймати 20 миллиард долларни ташкил этувчи уч йиллик лойиҳалар дастурини тайёрлашни топширди. Дастур доирасида 50 мингта иш ўрни яратилиши кўзда тутилган. Бу ҳақда давлат раҳбари матбуот хизмати хабар берди.
Топшириқ вилоятнинг ижтимоий-иқтисодий ривожланишига бағишланган йиғилишда берилди. Вилоятга бириктирилган лойиҳа менежери ва бошқа мансабдор шахслар масъул этиб белгиланди. Дастур хомашёни қайта ишлаш, юқори қўшилган қийматга эга маҳсулотлар ишлаб чиқариш ва янги ишлаб чиқариш қувватларини ишга туширишни қамраб олиши керак.
Аниқ имкониятлар сифатида GTL заводида умумий қиймати 300 миллион долларлик учта лойиҳа, 430 минг тонна нафта асосида полимерлар ва нефть-кимё маҳсулотлари ишлаб чиқариш имконияти ҳамда қиймати 1,5 миллиард долларга етиши мумкин бўлган лойиҳа қайд этилди. Шунингдек, Деҳқонобод калий заводи қувватини 365 минг тоннадан 600 минг тоннагача ошириш ва умумий қиймати 830 миллион долларлик кичик тоннажли кимё соҳасидаги 30 дан ортиқ таклифни амалга ошириш режалаштирилган.
Йирик корхоналар атрофида кооперация занжирларини шакллантириш вазифаси қўйилди. Йил охиригача Ғузор, Шўртан, Муборак, Деҳқонобод ва Нишонда олтита саноат кластери ташкил этилиши, Шўртан, Муборак, Яккабоғ ва Косонда эса «Қашқадарё» эркин иқтисодий зонасининг филиаллари очилиши керак. Биринчи босқичда инфратузилмага 250 миллиард сўм (21 миллион доллар) йўналтирилади.
Саноат лойиҳаларини энергия билан таъминлаш мақсадида келгуси йили қуввати 300 мегаватт бўлган қуёш электр станцияси ва Masdar компаниясининг энергия сақлаш тизимини ишга тушириш режалаштирилган. Қарши туманида чиқиндилардан электр энергияси ишлаб чиқариш лойиҳаси якунланмоқда. Нишон ва Кўкдала туманларида йирик подстанциялар қурилади. Шунингдек, узунлиги 245 километр бўлган Толимаржон — Сўғдиёна электр узатиш линияси қурилишини якунлаш кутилмоқда.
Қишлоқ хўжалигида қўшимча 200 минг кишини иш билан таъминлаш режалаштирилган. Жаҳон банки билан ҳамкорликда саккизта тумандаги 100 минг гектар яйловда Миср тажрибаси асосида дронлар ёрдамида қурғоқчиликка чидамли озуқа экинлари экиш ва чорвачилик мажмуаларини ташкил этиш кўзда тутилган. Шунингдек, 265 километр канал бетонланади, 20 та насос янгиланади ва 75 минг гектарда сув тежовчи технологиялар жорий этилади.
Осиё тараққиёт банки (ОТБ) иштирокида А-380 автомобиль йўлининг 100 километрлик қисми реконструкция қилинади. Қарши айланма йўли магистрал йўл билан туташтирилади, иккита темир йўл кесишмасида эса йўл ўтказгичлар қурилади.
Мирзиёев Қашқадарё вилоятидаги энг муҳим муаммолардан бири — аҳолини ичимлик суви билан таъминлаш масаласига алоҳида тўхталди. 2026 йил охиригача вилоятда 747 километр сув таъминоти ва канализация тармоқлари ҳамда 43 та иншоот қурилиши якунланади. Бу 200 минг кишини сув билан таъминлаш имконини беради. Ҳисорак сув омборидан Қарши шаҳри ва қўшни туманларгача сув қувури тортилиши яна 350 минг нафар аҳолининг сув таъминотини яхшилайди. Толимаржон — Муборак тизимини реконструкция қилиш эса бешта тумандаги 700 минг кишини қамраб олади.
Президентнинг таъкидлашича, бир неча йил аввал Қашқадарё ижтимоий-иқтисодий вазият энг мураккаб бўлган ҳудудлардан бири ҳисобланган. Энди эса ҳокимият йил охиригача вилоятда камбағаллик ва ишсизликни бартараф этишни мақсад қилган.
Янги иш ўринлари, жумладан, туризм соҳасини ривожлантириш билан ҳам боғланмоқда. Йил бошидан бери вилоятга 2,5 миллион сайёҳ ташриф буюрган, уларнинг 500 минг нафари Ғелон қишлоғига борган. У ерда тоғ-чанғи курортининг биринчи босқичини ишга тушириш режалаштирилган. Бошқа тоғли қишлоқларда этнотуризм, Шаҳрисабз туманида эса рафтинг ва спорт туризми ривожлантирилади. Олтита қишлоқ учун бош режалар тайёрланиб, умумий қиймати 50 миллион долларлик лойиҳаларни амалга ошириш бошланади.
