Марко Рубио. Оқ уй сайти фотосурати
АҚШ Давлат котиби Марко Рубио 100 дан ортиқ Америка компаниялари раҳбарларидан иборат делегацияга бошчилик қилиб, Ўзбекистонга ташриф буюради. Ташриф октябрь ойининг ўрталарида бўлиб ўтади ва Марказий Осиё давлатлари ҳамда АҚШ иштирокида Самарқандда ўтказиладиган C5+1 форматидаги вазирлар учрашувига бағишланади. Бу ҳақда АҚШнинг Ҳиндистондаги элчихонаси расмий сайтида АҚШнинг Жанубий ва Марказий Осиё бўйича махсус вакили Серджио Гор маълум қилди.
C5+1 формати АҚШ ва Қозоғистон, Қирғизистон, Тожикистон, Туркманистон ҳамда Ўзбекистонни бирлаштиради. Музокараларнинг асосий мавзулари минтақавий иқтисодий ўзаро боғлиқликни чуқурлаштириш, энергетика хавфсизлигини мустаҳкамлаш ва минтақа учун умумий бўлган вазифаларни биргаликда ҳал этишдан иборат бўлади.
Музокаралар давомида томонлар савдо ва инвестицияларни кенгайтириш имкониятларини муҳокама қилиши кутилмоқда. Муҳим минераллар ва нодир ер металлари соҳасидаги ҳамкорлик Вашингтон ва Тошкент учун алоҳида аҳамият касб этади.
2026 йил февраль ойида Ўзбекистон Ташқи ишлар вазири Бахтиёр Саидов Вашингтонда Рубио билан учрашган эди. Учрашув якунлари бўйича томонлар муҳим минераллар ва нодир ер элементларини қазиб олиш ҳамда қайта ишлаш соҳасида ҳамкорлик тўғрисида меморандум имзолади. Тошкент ушбу соҳани ривожлантириш учун Америка технологиялари ва инвестицияларини жалб қилишдан манфаатдор.
Бу йил АҚШ ва Ўзбекистон ўртасидаги иқтисодий ҳамкорлик институционал асосга ҳам эга бўлди. Апрель ойида Вашингтонда Америка–Ўзбекистон бизнес ва инвестициялар кенгаши расман ишга туширилди. Кенгаш 2025 йил ноябрь ойидаги C5+1 саммитида президентлар Шавкат Мирзиёев ва Дональд Трамп эришган келишув асосида ташкил этилган.
Рубио учун бўлажак ташриф Ўзбекистонга биринчи сафари ва ҳозирги лавозимида Марказий Осиёга илк ташрифи бўлади.
Аввалроқ Рубио 2026 йилда Марказий Осиёнинг барча беш давлатига ташриф буюриш нияти борлигини маълум қилган эди. Ҳозирча унинг Ўзбекистонга ташрифи расман эълон қилинган ягона сафар ҳисобланади.
