Фариба Хошимий. Khaama Press фотосурати
Афғонистонлик велосипедчи Фариба Ҳошимий Нагояда бўлиб ўтаётган Осиё ўйинларида аёллар ўртасидаги гуруҳли шоссе пойгасида кумуш медални қўлга киритди. Khaama Press нашри аниқлаганига кўра, у сўнгги йигирма йилдан ортиқ вақт ичида Осиё ўйинларида шоҳсупага кўтарилган илк афғонистонлик спортчи бўлди.
23 ёшли спортчи масофани 2 соат 50 дақиқа 5 сонияда босиб ўтди. У финишдаги спринтда Хитой вакили Гуо Лига (Ли Го) атиги сониянинг улушларида ютқазиб, иккинчи ўринни эгаллади. Олтин медаль Гуо Лига насиб этган бўлса, бронза медални Гонконг вакили Люнг Уин И қўлга киритди.
Ҳошимий ғолибга жуда яқин масофада финишга етиб келди — ҳар икки спортчи ҳам бир хил якуний натижани қайд этди. Афғонистон учун ушбу медаль 2002 йилдан буён, Осиё ўйинлари Пусан шаҳрида ўтказилганидан кейинги илк аёллар медали бўлди.
Ҳошимий Афғонистоннинг шимолидаги Фарёб вилоятида туғилган ва ёшлигидан спортда аёлларга нисбатан душманона муносабатга дуч келган: машғулот ўтказиш учун у ўзини ўғил бола сифатида кўрсатишга мажбур бўлган, очиқчасига велосипед ҳайдашга урингани учун эса уни ва бошқа қизларни тошбўрон қилишга уринишган. 2021 йилда «Толибон» ҳаракати мамлакатда ҳокимиятга қайтиб, аёлларнинг таълим ва спортда иштирок этишига нисбатан қатъий чекловлар жорий этганидан сўнг, Ҳошимий Афғонистонни тарк этади. Унинг мамлакатдан чиқиб кетишига велоспорт бўйича собиқ жаҳон чемпиони, италиялик Алессандра Каппеллотто ёрдам берган. Ҳозир спортчи Италияда яшайди ва машғулот ўтказади.
Ҳошимий аввал ҳам Париждаги Олимпиада ўйинларида Афғонистон номидан синглиси Юлдуз билан бирга иштирок этган. Юлдуз, шунингдек, яна бир афғонистонлик велоспортчи Заҳро Ризоий билан бирга жорий Осиё ўйинларида ҳам мамлакат делегацияси таркибида қатнашди. Спортчи ўз ғалабасини «ўзига хос бир нарса» деб атаб, уни афғонистонлик аёлларнинг матонати рамзи сифатида кўришини таъкидлади. Унинг сўзларига кўра, унинг ортида шундай орзу илинжида «турли мамлакатлардан миллионлаб аёллар» турибди.
20-Осиё ўйинлари Япониянинг Айти — Нагоя ҳудудида 45 та мамлакат ва ҳудуддан келган спортчилар иштирокида бўлиб ўтмоқда. Афғонистон делегациясининг эркак спортчилари мамлакатнинг ўзидан келган бўлса, аёл спортчилар, жумладан, велоспортчилар Афғонистондан ташқарида бўлган ҳолда миллий жамоага қўшилди — бунга «Толибон» томонидан жорий этилган чекловлар сабаб бўлганди.
