Елена Рибакина. championat.com сайти фотосурати
Қозоғистонлик теннисчи Елена Рибакина АҚШ Очиқ чемпионатида ғолиб чиқиб, фаолиятида илк бор жаҳон рейтингида биринчи ўринга кўтарилди.
US Open финалида 27 ёшли Рибакина мусобақада аввалги икки йилда ғолиб бўлган беларуслик Арина Соболенкони мағлуб этди. Учрашув 6:4, 5:7, 6:2 ҳисобида якунланди.
Қозоғистон вакили учун бу «Катта дубулға» турнирларидаги учинчи чемпионлик бўлди. Аввалроқ у 2022 йилги Уимблдон ва 2026 йилги Australian Open мусобақаларида ғолиб чиққан эди. Шу тариқа, Рибакина жорий мавсумда иккинчи бор «Катта дубулға»ни қўлга киритди.
«Бу турнир қандайдир ўзига хос кескин ўтди. Чунки мен рейтингда биринчи ўрин учун курашаётган эдим, бундан бир ҳафта олдин эса жароҳат олгандим. Ҳар бир кун ўзига хос синов бўлди, аммо бундай ҳолатлар аввал содир бўлганидагига қараганда, бу вазиятда ўзимни анча хотиржам ҳис қилдим», — деди қозоғистонлик теннисчи.
Рибакина WTA тарихида жаҳон рейтингида биринчи ўринни эгаллашга муваффақ бўлган 30-теннисчига айланди. Шунингдек, у нафақат аёллар, балки эркаклар ўртасида ҳам Қозоғистоннинг жаҳон рейтингида биринчи ўринга кўтарилган илк вакили бўлди.
Рибакина №1 бўлиш ҳуқуқини US Open ярим финалига чиққанидан сўнг, чорак финалда хитойлик Чжэн Циньвэньни мағлуб этганда кафолатлаган эди.
Қайд этиш жоиз, август ойида Рибакина жаҳон рейтингида биринчи ўринга чиқишга яқин келганди. Цинциннатидаги WTA 1000 турнирида Арина Соболенко мағлуб бўлганидан кейин, рейтинг пешқадамига айланиш учун унга финалга чиқишнинг ўзи кифоя эди. Бироқ, Ига Швёнтекка қарши чорак финал учрашувида қозоғистонлик теннисчи чап тўпиғидан олган жароҳати туфайли биринчи сетда 1:4 ҳисобида ўйинни давом эттиришдан бош тортди ва бу имкониятни бой берди.
Россия терма жамоаси таркибида Елена Рибакина 18 ёшгача бўлган ўсмирлар ўртасидаги Европа жамоавий чемпионатида ғолиб бўлган, шунингдек, яккалик баҳсларида WTA туркумидаги бир турнирда ғолиб чиққанди. 2018 йил июнь ойида спортчи Қозоғистон номидан иштирок этишга қарор қилади. 2021 йилда Франция Очиқ чемпионатида чорак финалгача етиб борган. 2022 йилда Уимблдонда ғолиб бўлди. 2023 йилда эса жаҳоннинг энг кучли уч теннисчиси қаторига кирган Қозоғистоннинг биринчи вакилига айланганди.
