ЖЧ-2 ОФК қуръа ташлаш маросими. ОФК фотосурати
Ўзбекистоннинг «Насаф» ва Туркманистоннинг «Аркадаг» футбол клублари ОФК Чемпионлар лигаси-2 мусобақасининг 2026/27 йилги мавсуми гуруҳ босқичидаги рақибларини билиб олди.
Қуръа натижаларига кўра, «Насаф» А гуруҳидан жой олди. Қаршиликлар БААнинг «Ал-Ваҳда», «Кувайт» ва Баҳрайннинг «Ал-Холидия» клубларига қарши ўйнайди.
Рақиблардан иккитаси ўзбек клубига Осиё мусобақаларидаги аввалги иштирокларидан яхши таниш. Ўтган мавсумда «Насаф» ОФК элита Чемпионлар лигасида «Ал-Ваҳда» билан учрашиб, Қаршида 1:2 ҳисобида мағлуб бўлганди. 2024/25 йилги ОЧЛ-2 мавсумида эса ўзбекистонликлар «Кувайт» билан бир гуруҳда ўйнаган ва ўз майдонида 1:2 ҳисобида ютқазганди.
«Аркадаг» эса В гуруҳидан жой олди. Унинг рақиблари БААнинг «Ал-Жазира», Эроннинг «Гол Гоҳар» ва Баҳрайннинг «Ал-Муҳаррақ» клублари бўлади.
Туркманистон клуби асосий босқичга саралаш орқали йўлланма олди. 12 август куни «Аркадаг» ўз майдонида Ҳиндистоннинг «Гоа» клубини 3:0 ҳисобида йирик мағлубиятга учратиб, ОЧЛ-2 йўлланмасини қўлга киритди. Мағлуб бўлган «Гоа» эса ОФК Чақирув лигасига йўл олди.
«Аркадаг» учун бу ОЧЛ-2да кетма-кет иккинчи мавсум бўлади. 2025/26 йилги мавсумда жамоа 7 очко тўплаб, ўз гуруҳида иккинчи ўринни эгаллади ва 1/8 финалга чиқди. У ерда Саудия Арабистонининг «Ал-Наср» клубига икки учрашув натижасига кўра 0:2 ҳисобида мағлуб бўлди. Бундан бир йил аввал «Аркадаг» ОФК Чақирув лигасида ғолиб бўлиб, клуб тарихидаги биринчи халқаро совринни қўлга киритган эди.
Жорий Осиё мавсумида Туркманистон яна бир клуби билан Чақирув лигасида ҳам иштирок этади. Мамлакат чемпионатининг кумуш медали соҳиби «Аҳал» ОФК клублар ўртасидаги мақоми бўйича учинчи ўринда турадиган мусобақа — Чақирув лигасининг гуруҳ босқичига тўғридан-тўғри йўлланма олди.
Ўзбекистон қитъанинг клублар ўртасидаги иккита асосий мусобақасида бирданига иштирок этади. ОФК элита Чемпионлар лигасида «Нефтчи» ва «Пахтакор» ўйнайди. «Нефтчи» мамлакат чемпиони сифатида элита босқичига тўғридан-тўғри йўлланма олган бўлса, «Пахтакор» мусобақани саралаш босқичидан бошлади ва унда Иорданиянинг «Ал-Ҳуссайн» клубини 3:0 ҳисобида мағлуб этди.
ОЧЛ-2нинг гуруҳ босқичида ҳар бир жамоа учта рақибининг ҳар бири билан уйда ва сафарда биттадан, жами олтита учрашув ўтказади. Ҳар бир гуруҳдан энг яхши икки жамоа 1/8 финалга чиқади. Мусобақа ғолиби 2027/28 йилги мавсумда ОФК элита Чемпионлар лигасининг дастлабки босқичида иштирок этиш ҳуқуқини қўлга киритади.
