Туркиянинг TAV Airports холдинги Қозоғистоннинг Kazakhstan Infrastructure Fund инфратузилма жамғармасидан қолган 15 фоиз акцияни сотиб олиб, Олмаота халқаро аэропортининг ягона мулкдорига айланди. Бу ҳақда давлат инвестиция компанияси Qazaqstan Investment Corporation (QIC) маълум қилди.
Битим қиймати 133 миллион АҚШ долларини ташкил этган.
TAV Airports гуруҳи 2020 йилдаёқ Олмаота аэропортини 415 миллион АҚШ долларига сотиб олишини эълон қилган эди. QIC 2021 йил баҳорида Kazakhstan Infrastructure Fund орқали ушбу лойиҳага қўшилган. Ўшанда жамғарма аэропортни ривожлантириш учун 30 миллион АҚШ доллари сармоя киритиб, унинг 15 фоиз акциясига эга бўлганди.
Шу тариқа, келишилган сотув нархи (133 миллион АҚШ доллари) дастлабки инвестиция ҳажмидан 4,4 баробар юқори бўлди.
«Курсив.kz» эслатишича, Kazakhstan Infrastructure Fund давлат билан боғлиқ жамғарма ҳисобланади. Унинг асосий эгаси — жамғарманинг 95,24 фоизига эгалик қилувчи Qazaqstan Investment Corporation (QIC). Ўз навбатида, QIC миллий бошқарув холдинги «Байтерек» таркибига киради.
Олмаота аэропорти — Қозоғистондаги энг йирик аэропорт. У 1935 йилда қурилган. Qazaqstan Investment Corporation маълумотига кўра, сўнгги йилларда аэропорт сезиларли даражада модернизация қилинган: янги халқаро терминал ишга туширилган, аввалги терминал эса ички рейсларга хизмат кўрсатиш учун қайта жиҳозланган.
Шу билан бирга, аэропорт турли ҳодисалар сабаб жамоатчилик эътиборида бир неча бор бўлганини ҳам таъкидлаш лозим. Жумладан, йўловчилар багаж ўғирланиши, терминалда сув оқиши ва бошқа муаммолардан шикоят қилган. Жорий йил июнь ойида Orda.kz нашри учиб кетиш залида вентиляция қувури қулаб тушгани ҳақида ёзган эди.
2025 йилда Олмаота аэропорти 6,3 миллион йўловчига хизмат кўрсатган. Бу кўрсаткич 2024 йилга нисбатан 19,4 фоизга кўпдир. TAV Airports учун Олмаота аэропорти компания портфелидаги 15-аэропорт ҳисобланади. Шунингдек, бу компания концессия ёки бошқа узоқ муддатли шартнома асосида бошқарадиган эмас, балки мулк ҳуқуқи асосида тўлиқ эгалик қиладиган илк аэропортдир.
