bureau.kz сайти фотосурати
Бойқўнғирда тату-устаси бўлиб ишлаган Қозоғистон фуқароси Роман Белов Россиянинг Оренбург вилоятида жосусликда гумон қилиниб қўлга олинди. Бу маълумотни Қозоғистон Халқаро инсон ҳуқуқлари бюросига (ҚХИҲБ) Қозондаги республика Бош консулхонаси тасдиқлади.
Қозоғистон дипломатлари қўлга олинган фуқаро билан учрашиш учун Россия ҳукуматига расмий сўров юборган. Шунингдек, консулхона унга тиббий ёрдам кўрсатилишини сўраган. Бу талаб Роман Беловнинг онасидан келиб тушган мурожаатга асосланган бўлиб, унда ўғлининг ўпкаси ва буйракларида оғриқлар борлиги қайд этилган.
Ҳуқуқ ҳимоячилари тарқатган хабарда айтилишича, Қозоғистон фуқароси қўлга олинганидан сўнг қийноққа солинган. Бироқ, консулхона Оренбург вилояти прокуратурасининг жавобини келтирган. Унда ўтказилган текширув давомида «Белов Р.Н.га нисбатан ғайриқонуний ҳаракатлар содир этилгани ёки унга нисбатан зўравонлик қўллангани ҳақидаги маълумотлар ўз тасдиғини топмагани» маълум қилинган.
Ҳуқуқ ҳимоячилари маълумотига кўра, 46 ёшли Роман Белов фитнес маркази деворларига безак ишларини бажариш буюртмаси баҳонасида Оренбургга чақирилган. У Россия ҳудудига келганидан сўнг қўлга олинган. Тергов талқинига кўра, у гўёки шахси аниқланмаган шахсга махфий маълумотларни ўз ичига олган ахборотни етказган. Ҳозирда Белов Оренбург шаҳридаги тергов ҳибсхонасида сақланмоқда.
Қўлга олинган шахснинг турмуш ўртоғи айтишича, айбловнинг асосий далили сифатида муайян маълумотлар акс этган жадвалнинг скриншоти келтирилган. Бироқ, унинг сўзларига кўра, тергов Белов ушбу маълумотларни ҳақиқатан ҳам электрон почта, мессенжерлар ёки бошқа йўл билан юборганини тасдиқловчи ҳеч қандай далил тақдим этмаган.
Унинг турмуш ўртоғи яна шуни маълум қилганки, Белов аввалроқ Бойқўнғирда яшовчи ва Украинада Россия томонида жанг ҳаракатларида қатнашган бир шахс билан сиёсий қарашлари сабабли зиддиятга борган. Унинг айтишича, Белов Россиянинг Украинага бостириб киришига қарши бўлган.
