t.me/nemolchikz фотосурати
Ҳуқуқни ҳимоя қилиш ҳаракати «НеМолчи» NeMolchi Network халқаро ҳамжамиятини ташкил этди. Янги тузилманинг ишга туширилгани ҳақида 9 июль куни — ҳаракат ташкил этилганининг ўн йиллиги муносабати билан маълум қилинди, деб хабар берди Қозоғистон Халқаро инсон ҳуқуқлари ва қонунларга риоя этилишини таъминлаш бюроси.
Ташкилот баёнотида қайд этилишича, NeMolchi Network Қозоғистон, Грузия ва Черногорияда фаолият юритаётган инсон ҳуқуқларини ҳимоя қилиш ташаббусларини бирлаштиради. Ушбу ҳамжамият асосига зўравонликдан жабр кўрган аёллар ва болаларни ҳимоя қилиш йўлидаги ўн йиллик тажриба қўйилган.
«НеМолчи» ҳаракати Қозоғистонда 2016 йилда Дина Тансари (Динара Смаилова) томонидан жамоатчилик ташаббуси сифатида ташкил этилган. Бир йил ўтиб, у хайрия маблағлари ҳисобига фаолият юритган жамоат фонди шаклида рўйхатдан ўтказилган. 2023 йилда ташкилот хориждаги фаолиятини кенгайтириб, Грузияда Break Silence Worldwide халқаро фондини ташкил этган. 2026 йил май ойида эса Черногорияда Ne ćuti фонди рўйхатдан ўтказилди.
Ўн йил давомида «НеМолчи» мутахассислари 83 мингдан ортиқ бепул маслаҳатлар ўтказди, оғир ва ўта оғир жиноятлар бўйича 354 та жиноят иши юзасидан айблов ҳукмлари чиқарилишига эришди. Ушбу ишлар орасида болаларга қарши жиноятлар бўйича 117 та иш ҳам бор. Бундан ташқари, ҳаракат 13 нафар полиция ходимининг судланишига ва ўсмирлар ҳамда аёлларга нисбатан қўзғатилган қатор жиноят ишларининг қайта кўриб чиқилишига эришган.
NeMolchi Network ҳаракат ривожининг кейинги босқичи бўлиши керак. Яқин вақт ичида халқаро ҳамжамиятнинг мақсадлари, тамойиллари ва ягона ахлоқий стандартларини белгилаб берадиган декларацияси, стратегияси ҳамда кўнгиллилар кодекси тақдим этилади.
Ҳаракат асосчиси Дина Тансари Қозоғистонда жиноий таъқибга учраган. Унга нисбатан фирибгарлик ва ёлғон маълумотлар тарқатиш бўйича бир нечта жиноят ишлари қўзғатилган. Унинг ўзи бу ишларни инсон ҳуқуқларини ҳимоя қилиш фаолияти билан боғлайди. 2025 йилда Тансари Черногориядан сиёсий бошпана олган.
2025 йил декабрь ойида «НеМолчи» фонди ташкилот ҳисоб рақамлари блокланганидан кейин ходимларнинг руҳий чарчаши ва молиявий қийинчиликлар юзага келганини изоҳлаб, ишонч телефони фаолияти вақтинча тўхтатилганини маълум қилди.
