Чапдан ўнгга: Жумгалбек Шабданбеков, Мақсат Асаналиев, Малик Бектурганов. 24.kg сайти фотосурати
Қирғизистон Миллий хавфсизлик давлат қўмитаси (МХДҚ) раиси вазифасини вақтинча бажарувчи этиб Максат Асаналиев тайинланди. Бу ҳақдаги фармонга мамлакат президенти 30 июнь куни имзо чекди.
Асаналиевнинг номзоди келишиш ва лавозимга тайинлаш учун Жогорку Кенеш (парламент)га киритилди. У бунга қадар Қирғизистон Бош прокурори лавозимида фаолият юритган. Бош прокурор вазифасини эса вақтинча унинг биринчи ўринбосари Малик Бектурганов бажаради.
Асаналиевдан аввал Миллий хавфсизлик давлат қўмитасига раҳбарлик қилган Жумгалбек Шабданбеков бошқа ишга ўтгани муносабати билан лавозимидан озод этилди. У махсус хизмат раҳбари лавозимини 2026 йил февраль ойида, Камчибек Ташиев истеъфога чиққанидан сўнг эгаллаган эди. Кейинчалик эса Ташиев давлат тўнтаришига уриниш бўйича қўзғатилган жиноят ишида айбланувчилардан бирига айланди.
ℹ️ Максат Асаналиев 1978 йилда Иссиқкўл вилоятида туғилган. У Қирғизистон Миллий университетининг юридик факультетини тамомлаган. 2001 йилдан бошлаб у Миллий хавфсизлик давлат қўмитасида (МХДҚ) терговчи ва ўта муҳим ишлар бўйича катта терговчи сифатида фаолият юритган, шу жумладан 2010 йилгача Тергов бошқармасида ишлаган. Кейин у икки йил давомида Бош прокуратурада ўта муҳим ишлар бўйича терговчи бўлиб хизмат қилган, сўнг яна Тергов бошқармасига қайтган. Кейинчалик у ички терговлар бўлимига раҳбарлик қилган, Бишкекнинг Первомайский тумани прокурори бўлган ҳамда Бош прокуратура тизимида турли раҳбарлик лавозимларида ишлаган. 2022 йил май ойидан бошлаб Ўш вилояти прокурори лавозимини эгаллаган, 2024 йил июнь ойида эса Қирғизистон Бош прокурори этиб тайинланган.
