Муратбай Жумагалиев ҳибсга олиш пайтида. vlast.kz сайти фотосурати
Қозоғистонлик фаол Муратбай Жумагалиевга қарши жиноят иши оғирроқ жиноят сифатида қайта таснифланди, деб хабар беради унинг адвокати Айгул Айжарикова Vласть.kz нашрига.
Жумагалиев дастлаб гиёҳванд моддаларни жуда катта миқдорда ноқонуний олиб юришда (ҚР Жиноят кодексининг 296-моддаси, 4-қисми) айбланган бўлиб, бу етти йилгача озодликдан маҳрум қилиш жазосини назарда тутади. Энди айблов жуда катта миқдорда гиёҳванд моддаларни сотиш мақсадида ноқонуний қўлга киритиш, сақлаш ва ташишга ўзгартирилган (ҚР Жиноят кодексининг 297-моддаси, 3-қисми). Адвокатнинг таъкидлашича, жазо 12 йилгача қамоқ жазосини ўз ичига олади.
Унинг сўзларига кўра, суд Жумагалиевни икки ойга ҳибсга олишга рухсат берган. Ҳозирда у тергов ҳибсхонасида.
Фаолнинг ҳибсга олиниши 4 июнь куни маълум бўлди. Суд-тиббий экспертизасига кўра, Жумагалиев чўнтагидан 108 грамм опиат топилган. Ижтимоий тармоқларда тарқалган видеода у айбловлар «уйдирма» экани ва тақиқланган модда атайин унинг чўнтагига солиб қўйилганини даъво қилаётганини эшитиш мумкин.
Муратбай Жумагалиев — Жанаўзеннинг энг таниқли фуқаролик фаолларидан бири, 2011 йили нефтчилар иш ташлашида иштирок этган, ўшанда норозилик намойишлари тарқатиб юборилиши натижасида 17 киши ҳалок бўлганди. Ушбу воқеалардан сўнг, у оммавий тартибсизликларда иштирок этганликда айбланган 37 нафар судланувчи қаторида бўлган ва уч йиллик шартли қамоқ жазосига ҳукм қилинган.
Фаол рухсатсиз митингларда иштирок этгани учун бир неча бор маъмурий жавобгарликка тортилган, 2011 йилги воқеалар бўйича янги тергов ўтказишни, сиёсий маҳбусларни озод қилишни талаб қилган ва мамлакат президентини танқид қилган.
Фаол ҳибсга олинганидан сўнг 5 июнь куни «Озенмунайгаз» нефть компанияси ишчилари ишни бир соатга тўхтатиб қўйишган. Нефтчиларнинг иш ташлаши акс этган видео интернетда тарқалган. Кадрда бир киши республика президенти Қосим-Жомарт Тўқаевга мурожаат қилиб, Жумагалиевнинг озод қилинишини таъминлашда ёрдам сўраган. Намойишчи фаолнинг «турли ҳийла-найранглар орқали қўйилган сохта айбловлар» билан ҳибсга олинганини даъво қилади.
