Александр Турчин, Абдулла Арипов ва Фирдавс Абдухолиқов. ИЦМ матбуот хизмати фотосурати
Беларусь Бош вазири Александр Турчин бошчилигидаги делегация Ўзбекистон Ислом цивилизацияси марказига ташриф буюрди. Бу ҳақда Марказ матбуот хизмати хабар берди.
Меҳмонларга Ўзбекистон Бош вазири Абдулла Арипов, Марказ директори Фирдавс Абдухолиқов ва академик Акбар Ҳакимов ҳамроҳлик қилди.
Беларусь делегациясига Ўзбекистоннинг уч минг йиллик тарихини акс эттирувчи экспонатлар, ноёб тарихий артефактлар ва замонавий мултимедиа ечимлари тақдим этилди.
Исломгача бўлган давр бўлимида делегация қадимги цивилизациялар ривожланиши ва уларнинг илмий ва маданий ютуқлари ҳақидаги материалларни кўриб чиқди. Биринчи ва Иккинчи Ренессансга бағишланган залларда улар Темурийлар даврига оид ноёб экспонатлар, миниатюра санъати намуналарини томоша қилишди ва меъморий ёдгорликлар ҳақида маълумот олишди.
Меҳмонларга ИЦМнинг хориждаги галереялар ва аукционларда сақланаётган йўқолган маданий мерос асарларини топиш ва қайтариш бўйича олиб бораётган ишлари, шунингдек, бу соҳада халқаро ҳамкорлик истиқболлари ҳақида маълумот берилди.
«Ушбу мажмуа ўзининг кўлами ва пухта ўйланган концепцияси билан ажралиб туради. Бу ташриф буюрувчиларга минг йилликлар давомида бизгача етиб келган буюк цивилизацияларни бошдан кечириш имконини беради. Бу ерда пайдо бўлган ҳис-туйғуларни бир сўз билан ифодалаш қийин. Кўргазма чуқур ва мазмунли таассурот қолдиради. Бундай лойиҳалар, шубҳасиз, мамлакатнинг узоқ муддатли ривожланишига қаратилган», — деди Турчин.
ℹ️ Ислом цивилизацияси маркази Хасти-Имом мажмуаси ёнида қурилмоқда. Иншоот қадимги меъморий обидалар шаклида бунёд этилмоқда. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Марказнинг энг асосий қисмида Қуръони карим зали бунёд этилмоқда. Бу ерда 460 ўринли анжуманлар зали ҳам қуриб битказилди. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
