Меморандум имзолаш маросими. Шахмурат Муталип чапда. Чимкент ҳокимияти матбуот хизмати фотосурати
Чимкент ҳокими Габит Сиздибеков ва Construction KZ бош директори, Қозоғистон Бокс федерацияси раҳбари Шахмурат Муталип «Ордабаси» футбол клубини хусусийлаштириш тўғрисида меморандум имзоладилар. Бу ҳақда Exclusive.kz сайти шаҳар ҳокимияти матбуот хизматига таяниб хабар берди.
Ҳужжатда хусусий инвестицияларни жалб қилиш, барқарор бозор бошқарув моделига ўтиш ва замонавий корпоратив бошқарув стандартларини жорий этиш кўзда тутилган. Асосий мақсадлар клуб иншоотларини модернизация қилиш, машғулот инфратузилмасини ривожлантириш, бошқарув жараёнларини рақамлаштириш ва унинг тижорат самарадорлигини оширишдан иборат.
«Бу муҳим қадам Чимкентнинг мамлакат етакчи футбол марказларидан бири сифатидаги мавқеини мустаҳкамлайди. Бу клубни миллий ва халқаро миқёсда рақобатбардош қилади, унинг имкониятларини кенгайтиради ва профессионал спортни барқарор ривожлантириш учун қўшимча ресурсларни жалб қилади», — деди ҳоким.
Ўз навбатида, Шахмурат Муталип компания клубни ривожлантиришни узоқ муддатли ва ижтимоий аҳамиятга эга лойиҳа сифатида кўришини таъкидлади.
««Ордабасы» — бой тарихга ва кучли мухлислар қўллаб-қувватлашига эга клуб. Мақсадимиз клубнинг барқарор ривожланишини таъминлаш, инфратузилмага алоҳида эътибор бериш, ёш футболчиларни тайёрлаш ва рақобатбардош жамоани шакллантиришдир», — деди бизнесмен.
Ҳокимиятнинг таъкидлашича, меморандум президент Қосим-Жомарт Тўқаевнинг профессионал футбол клубларини хусусийлаштириш ва тижоратлаштириш бўйича кўрсатмалари доирасида амалга оширилмоқда.
Ўтган куздан бери Қозоғистонда қуйидаги клублар хусусийлаштирилди:
➡️ «Қайсар» (Қизил-Ўрда) — Исламгали Козбаков (TAU Group Ltd);
➡️ «Қизилжар» (Петропавловск) — Сергей Кан;
➡️ «Женис» (Остона) — Михаил Ломтадзе (Kaspi.kz);
➡️ «Шахтёр» (Қарағанда) — Тимур Турлов (Freedom Holding орқали);
➡️ «Актобе» (Актобе) — Нурлан Артиқаев (Qazaq Stroy).
Остона ва Атирау шаҳарлари хусусийлаштириш жараёнида ва «Елимай» (Семей), «Туран» (Туркистон), «Иртиш» (Павлодар), «Тараз», «Тобол» (Қўстанай) клубларининг яқинда хусусий мулкка ўтказилиши ҳақида миш-мишлар тарқалмоқда.
