ҚФФ сайти фотосурати
2028 йилги УЕФА Суперкубоги учун ўйинлар Остонадаги «Астана Арена» стадионида бўлиб ўтади. Бундай қарорни 15 сентябрь куни Салоникида бўлиб ўтган йиғилишда Европа футбол ассоциациялари иттифоқининг Ижроия қўмитаси қабул қилди, деб хабар беради УЕФА расмий сайти.
Қозоғистон илк бор УЕФА Суперкубоги учун бўладиган ўйинларга мезбонлик қилади. Унда ўтган мавсумдаги Чемпионлар лигаси ва Европа лигаси ғолиблари ўзаро куч синашади.
«Астана Арена»ни тайёрлаш жараёнида ташкилотчилар майдон қопламаси масаласини ҳал қилиши керак. 2025 йил бошида якунланган реконструкциядан сўнг стадионга иситиш ва суғориш тизимлари билан жиҳозланган янги сунъий газон ётқизилган. Шу билан бирга, УЕФА Суперкубогининг амалдаги регламентига кўра, матч табиий газонли майдонда ўтказилиши керак.
Бундай муаммо аввал ҳам юзага келган. «Астана Арена» 2019 йилги УЕФА Суперкубогини ўтказишга даъво қилган эди. УЕФАнинг аризалар бўйича ҳисоботида стадионда сунъий қоплама борлиги, Қозоғистон томони эса уни табиий газонга алмаштириш имкониятини ўрганаётгани қайд этилган. Охир-оқибат, 2019 йилги ўйинлар Истанбулда бўлиб ўтган.
Шу билан бирга, Қозоғистон УЕФАнинг футзал бўйича финал мусобақаларига мезбонлик қилган. Олмаота 2011, 2017 ва 2019 йилларда футзал бўйича Европанинг асосий клублар турнири ҳал қилувчи босқичларини қабул қилган. 2011 йилда мусобақалар Балуан Шолақ номидаги Спорт саройида, 2017 ва 2019 йилларда эса «Алмати Арена»да ўтказилган.
«Астана Арена» 2009 йилда очилган бўлиб, тахминан 30 минг томошабинга мўлжалланган. Бу ерда Қозоғистон терма жамоаси ва пойтахтнинг «Астана» клуби ўз уй учрашувларини ўтказади. 2025 йилда стадионда кенг кўламли реконструкция ишлари якунланди. Унда, жумладан, муҳандислик тизимлари янгиланди ва майдоннинг сунъий қопламаси алмаштирилди.
УЕФА Суперкубогининг амалдаги соҳиби — Франциянинг ПСЖ клуби. Соврин учун баҳсда парижликлар Англиянинг «Астон Вилла» жамоасини 2:1 ҳисобида мағлуб этди. Учрашув 12 август куни Австриянинг Зальцбург шаҳридаги «Ред Булл Арена» стадионида бўлиб ўтди. 2027 йилги УЕФА Суперкубоги учун ўйинлар Амстердамдаги «Йохан Кройф Арена»да ўтказилади.
