2026 йили Сирдарё вилоятида хитойлик ишбилармонлар билан биргаликда автомобилсозлик бўйича 122 миллион долларлик лойиҳа ишга туширилади. Ушбу ташаббус мамлакатлар ўртасидаги муваффақиятли ҳамкорликнинг намунасидир. Шу муносабат билан, Сирдарё вилояти халқ депутатлари кенгашининг навбатдан ташқари сессиясида нутқ сўзлаган президент Шавкат Мирзиёев вилоят ҳокимиятига хитойлик ҳамкорлар билан ҳамкорликни мустаҳкамлаш ва кенгайтиришни топширди. Бу ҳақда президент матбуот хизмати хабар берди.
Таъкидланишича, сўнгги йилларда Сирдарёда Хитой компаниялари билан биргаликда умумий қиймати 500 миллион долларга тенг 31 та корхона ишга туширилди, бу эса вилоятнинг 5000 фуқароси учун юқори даромадли иш ўринларини яратди. Хитой ишбилармон доиралари билан ҳамкорлик давом этмоқда, қиймати 700 миллион долларга тенг яна 40 та лойиҳани ишга тушириш режалаштирилган.
Йиғилишда таъкидланишича, Янгиер, Гулистон ва Ширин шаҳарлари, Сирдарё, Боёвут, Гулистон, Мирзаобод, Оқолтин, Ховос туманлари ҳисобига Сирдарё эркин саноат зонаси ҳудуди 1080 гектаргача кенгайтирилди. Вилоят ва туман ҳокимларига саноат зонасига қўшиб берилган майдонларда камида 4 миллиард долларлик лойиҳаларни бошлаш муҳимлиги кўрсатиб ўтилди.
Шу мақсадда давлат раҳбари лойиҳаларнинг самарадорлигини синчковлик билан баҳолаш ва инвесторлар учун тақдимотлар тайёрлаш, шунингдек, Сирдарё вилоятидан Хитойга бир нечта шаҳар ва туман раҳбарларини ўз ичига олган делегация юбориш вазифасини юклади.
Бундан ташқари, қурилиш материаллари бўйича Цзянсу, Шаньдун ва Гуандун, кимё саноати бўйича Тяньцзинь, электротехникада Фуцзянь ва Гонконг, енгил саноатда Шаньдун ва Синьцзян, фармацевтика соҳасида Шанхай ва Цзянси ҳудудлари билан тўғридан-тўғри ҳамкорлик ўрнатиш вазифаси қўйилди.
Шунингдек, Гулистон шаҳрида камида 5 минг иш ўрнига эга «Ўзбекистон – Шанхай ҳамкорлик ташкилоти» савдо ва саноат зонаси ташкил этилиши белгиланди. Бу ердаги объектлар тайёр лойиҳа сифатида тадбиркорларга саноат ипотекаси ёки лизинг асосида таклиф этилади.
Мирзиёев бошқа соҳаларда, айниқса ижтимоий-иқтисодий соҳаларда халқаро тажрибани қўллаш зарурлигини таъкидлади. Шу мақсадда 11 та туман ҳокимининг биринчи ўринбосарини Пекиндаги Камбағалликка қарши курашиш бўйича халқаро марказда амалиёт ўташини ташкил қилиш, сирдарёлик 50 ёшни Пекин шаҳрида автомобилларга техник хизмат кўрсатиш бўйича курсларда ўқитиш топширилди.
Таълим лойиҳалари ҳам муҳокама қилинди. Шундай қилиб, Гулистон университети қошида Хитойнинг «Лу Бан устахонаси» дастури доирасида касб-ҳунарга ўқитиш марказини, Сирдарё туманидаги тиббиёт техникуми негизида эса Хитой билан ҳамкорликда фармацевтика технологиялари йўналишида олийгоҳ ташкил этиш бўйича кўрсатмалар берилди.
