Your.tj сайтидан иллюстратив фотосурат
Тожикистон ҳукумати терактлар оқибатида ҳалок бўлган ёки аксилтеррор амалиётлари давомида ҳалок бўлган террорчиларни дафн этишнинг янги қоидаларини тасдиқлади – энди уларнинг жасадлари қариндошларига берилмайди. Бу ҳақда «Озоди» (РФда хорижий агент сифатида тан олинган Озодлик радиосининг тожик хизмати) хабар берди.
Ҳужжат 28 апрелда қабул қилинган, Адлия вазирлиги уни 5 майда давлат рўйхатидан ўтказган, бироқ расмий очиқ манбаларда эълон қилинмаган. Ҳокимият қарорининг нусхаси «Озоди»га фақат 22 май куни келган.
Янги қоидаларга кўра, кўмишни амалга оширувчи маҳаллий ҳокимият ва ташкилотлар террорчиларнинг жасадларини тергов органлари кўрсатган ерга кўмишлари шарт. Жасадлар ёпиқ тобутларда дафн этиладиган жойга етказилади. Дафн жойини бировга ошкор қилиш тақиқланади.
Дафн этиш китобида террорчининг фамилияси, исми, отасининг исми, туғилган ва вафот этган санаси, шунингдек, қабрининг рақами ёзилмайди. Ҳужжатда фақат дафн этилган сана, ўлим тўғрисидаги тиббий маълумотномани ким берганлиги, шунингдек дафн этишни амалга оширган ташкилотнинг номи ва манзили кўрсатилади.
Аксилтеррор операцияси чоғида ҳалок бўлган чет элликлар ва фуқаролиги бўлмаган шахсларнинг ўлими тўғрисида тегишли давлатларнинг дипломатик ваколатхоналари ёки консуллик муассасалари Тожикистон Ташқи ишлар вазирлиги орқали хабардор қилинади.
Авваллари республика расмийлари аксилтеррор амалиётлари чоғида ҳалок бўлганларни қариндошларига дафн қилишга рухсат берган. Дафн маросимида одатда марҳумнинг чекланган миқдордаги қариндошлари қатнашган, жасадлар ҳуқуқ-тартибот идоралари назорати остида ўликхонадан қабристонга етказилган.
Тожикистон ҳукумати вақти-вақти билан террорчилар ҳибсга олингани ҳақида хабар бериб келади, шунингдек турли махсус операциялар давомида ўлдирилган фуқароларни терроризмга алоқадорликда айблайди. Халқаро инсон ҳуқуқлари ташкилотлари ва Ғарб давлатлари Тожикистон ҳукуматини экстремизм ва терроризмга қарши кураш баҳонасида фуқаролик жамияти фаоллари ва диссидентларга қарши репрессияларни кучайтираётгани учун мунтазам равишда танқид қилиб келади.
