Чоршанбе Чоршанбиев. avesta.tj сайти фотосурати
Душанбе шаҳар суди блогер ва ММА жангчиси Чоршанбе Чоршанбиевга чиқарилган ҳукмни ўз кучида қолдирди. Бу ҳақда «Озоди» (Россия Федерациясида хорижий агент сифатида тан олинган «Озодлик» радиосининг тожик хизмати) хабар беради.
Жорий йилнинг 13 май куни Исмоили Сомоний шаҳар туман суди Чоршанбиевни «Интернет орқали конституциявий тузумни зўравонлик билан ўзгартиришга оммавий чақириқлар уюштириш»да айбдор деб топиб, 8,5 йилга озодликдан маҳрум қилганди. Чоршанбиев ва унинг адвокатлари суд ҳукмини «асоссиз ва ноқонуний» деб атади ва апелляция шикояти берди.
Шаҳар суди қарори 29 июнь куни эълон қилинди. Айбланувчининг адвокатларига кўра, «суд биринчи инстанция ҳукмини ўз кучида қолдириб, кассация шикоятини қаноатлантирмади». Суднинг аввалги суд ҳукмини ўзгаришсиз қолдиришга қарор қилган асослари номаълум. Душанбе шаҳар суди қарори устидан шикоят қилинадими ёки йўқми, адвокатлар ҳозирча бир қарорга келмаган.
«Кейинги ҳафтада тергов изоляторида мижозимиз билан учрашиб, унинг позициясини аниқлаймиз. Кейин кассация судига мурожаат қилиш, қилмасликни ҳал қиламиз», — деди спортчининг адвокатлари.
Эслатиб ўтамиз, ўтган йил 6 декабрь куни Москванинг Останкино туман суди 26 ёшли Чоршанбе Чоршанбиевни миграция қонунчилигини бузганликда айбдор деб топиб, 5 минг рубль миқдорида жарима тўлаш ва Россия Федерациясидан чиқариб юбориш ҳақида қарор чиқарганди. 29 декабрь куни Москва шаҳар суди Чоршанбиевни депортация қилиш ҳақидаги қарорни ўз кучида қолдирди.
ММА жангчиси Ички ишлар вазирлигининг Москва шаҳар бош бошқармасининг Хорижий фуқароларни вақтинча сақлаш марказига жойлаштирилди ва эртаси куни самолётда Тожикистонга жўнатилди, у ерда унга нисбатан Тожикистон Республикаси Жиноят кодексининг 189-моддаси («Ижтимоий, ирқий, миллий, минтақавий, диний адоват ёки нифоқ қўзғатиш») ва 307- («Тожикистон Республикаси конституциявий тизимини зўравонлик билан ўзгартиришга доир оммавий чақириқлар қилиш») моддаси билан жиноий иш қўзғатилди. Адвокатларнинг таъкидлашича, спортчига қарши асосий далил 2021 йил ноябрь ойи охирида интернетда тарқатилган унинг видеомурожаати бўлган. Видеода спортчи 2021 йил ноябрь ойида Хоруғда бўлиб ўтган воқеаларни тилга олади. Чоршанбиев халқни ҳукуматга қарши норозиликка ундаганликда айбланган.
