Тошкент халқаро форуми иш бошлайди

Бугун IV Тошкент халқаро инвестиция форуми (ТХИФ-2025) иш бошлайди: расмий тадбирлар, жумладан, инвестиция кўргазмаси 2025 йил 9 июнь куни бошланади ва асосий бизнес дастури 10-12 июнь кунлари Тошкентда бўлиб ўтади.

Форум анъанавий тарзда дунёнинг 100 дан ортиқ давлатидан 3000 дан ортиқ иштирокчи, жумладан, президентлар, вазирлар, етакчи молия институтлари вакиллари, сиёсатчилар, иқтисодчилар, дунёдаги энг йирик корпорациялар ва инвестиция фондларининг топ-менежерлари, шунингдек, барқарор ривожланиш, инновациялар ва рақамли трансформациялар бўйича экспертларни ўзида жамлайди.

Бу йил форум Европадан юқори мартабали вакиллар иштирок этиши билан алоҳида аҳамият касб этмоқда. Президент Шавкат Мирзиёевнинг таклифига биноан 8—10 июнь кунлари Словакия Бош вазири Роберт Фицо расмий ташриф билан Ўзбекистонда бўлади.

Ташриф икки томонлама муносабатларни мустаҳкамлаш, саноат ва энергетика каби стратегик муҳим соҳаларда ҳамкорликни кенгайтиришга қаратилган. Икки давлат президентлари туризм салоҳиятини ривожлантириш ва меҳнат миграцияси масалаларини муҳокама қилади. Фицонинг Тошкент халқаро инвестиция форумидаги иштироки унинг ташрифининг муҳим қисми бўлиб, Ўзбекистоннинг сармоявий салоҳиятини халқаро майдонда намойиш этиш имконини беради.

Бундан ташқари, Болгария Президенти Румен Радев 9-11 июнь кунлари расмий ташриф билан Ўзбекистонга келади. У Ўзбекистон раҳбарияти билан музокаралар ўтказиши, қатор икки томонлама шартномалар имзолаши, шунингдек, форумда фаол иштирок этиши кутилмоқда.

Бошқа асосий меҳмонлар орасида Европа Иттифоқи мамлакатлари, жумладан, Германия ва Франция делегациялари, шунингдек, энг йирик Осиё инвесторлари: Саудия Арабистони, Хитой, БАА ва Туркия вакиллари бор. Ўтган йиллари имзоланган шартномалар ҳажми бўйича айнан шу давлатлар етакчи бўлган.

Россия ва Марказий Осиёнинг бошқа давлатларидан ҳам делегациялар иштирок этиши кутилмоқда.

👉 Форум маърузачиларининг тўлиқ рўйхати тадбирнинг расмий сайти — TIIF.online да жойлаштирилган.

Форумнинг асосий мавзулари иқтисодий ва инновацион соҳаларнинг кенг доирасини қамраб олади. Улар орасидан — кичик ва ўрта бизнесни ривожлантириш, саноат тараққиёти (автомобилсозлик, электротехника, машинасозлик), сув ресурсларини бошқариш, инвесторларни ҳуқуқий ҳимоя қилиш, финтех ва электрон тижоратни ривожлантириш, яшил энергия ва барқарор ривожланиш, хусусийлаштириш ва инвестиция ислоҳотлари, шаҳарсозлик ва инфратузилмани модернизация қилиш, тўқимачилик ва кимё саноатида ишлаб чиқариш занжирларини ривожлантириш, шунингдек, кимё саноати, шунингдек, рақамлаштириш ва сунъий интеллект бизнес учун янги уфқлар ўрин олган.

Форум доирасида илк бор инвестиция кўргазмаси ташкил этилиб, унда йирик хусусий ва маҳаллий компаниялар ўз лойиҳаларини тақдим этади, бу уларга халқаро инвесторлар билан бевосита мулоқот қилиш имконини беради.

11 июнь куни Ўзбекистон Президенти ҳузуридаги Хорижий инвесторлар кенгашининг учинчи ялпи мажлиси ҳам жаҳоннинг етакчи компаниялари ва молия институтлари раҳбарлари иштирокида бўлиб ўтади.

Охирги уч йил давомида форум умумий қиймати 44 миллиард долларлик 357 та инвестиция шартномасини имзолаш майдончасига айланди. Улардан 57 таси амалга оширилган бўлса, 263 таси бўйича қурилиш-лойиҳалаш ишлари олиб борилмоқда.

Шундай қилиб, «Тошкент халқаро инвестиция форуми-2025» Ўзбекистоннинг Марказий Осиёдаги етакчи сармоявий марказ мақомини тасдиқлайди ва жорий иқтисодий муаммолар ва истиқболларни муҳокама қилиш учун кенг доирадаги халқаро иштирокчиларни бирлаштиради.