Қозоғистонда жисмоний шахслар чет элдан шахсий фойдаланиш учун олиб кирадиган автомобилларга нисбатан янги талаблар расман белгиланди. Унга кўра, мамлакатга фақат беш йилдан эски бўлмаган ва экологик стандарти Евро-5 дан паст бўлмаган автомобилларни олиб киришга рухсат берилади. Бу ҳақда норматив-ҳуқуқий ҳужжатлар онлайн базасида эълон қилинган ҳукумат қарорида сўз юритилади.
Агар автомобиль беш йилдан эски бўлса ёки унинг двигатели Евро-5 стандартига жавоб бермаса, уни Қозоғистонда рўйхатдан ўтказиш имкони бўлмайди. Шу билан бирга, юридик шахслар ва якка тартибдаги тадбиркор сифатида рўйхатдан ўтган жисмоний шахслар учун аввалги Евро-4 талаби сақланиб қолади.
Қарор илк расмий эълон қилинган кундан кейин 60 календарь кун ўтгач, яъни 2026 йил 30 декабрдан кучга киради.
Эслатиб ўтамиз, 2026 йил 28 сентябрдан бошлаб Қозоғистонда жисмоний шахслар томонидан автомобилларни олиб кириш қоидалари аллақачон қатъийлаштирилган эди. Энди транспорт воситаларининг электрон паспортлари ва транспорт воситаси конструкцияси хавфсизлиги тўғрисидаги гувоҳномалар фақат беш йилдан эски бўлмаган, йўловчи божхона декларацияси асосида олиб кирилган ва камида 48 фоиз миқдорида ягона тўлов тўланган автомобилларга расмийлаштирилади. Бундан ташқари, бир киши йилига кўпи билан битта автомобиль олиб кириши мумкин. Ундан кўп автомобиль олиб кириш тижорат фаолияти ҳисобланади ва бунга фақат тадбиркорлик доирасида рухсат берилади.
Ўзгартишлар Қозоғистонда автомобилсозлик ишлаб чиқариши ҳажми ортиб бораётган бир пайтда қабул қилинди. Миллий статистика бюроси маълумотларига кўра, 2026 йил январь–сентябрь ойларида мамлакатда 136 548 та автомобиль ишлаб чиқарилган. Бу ўтган йилнинг шу даврига нисбатан 38 фоизга кўп. Республикада жами 12 та автомобилсозлик корхонаси фаолият юритмоқда.
Август ойида Inbusiness нашри экспертларга таяниб, Қозоғистонда автомобиллар ортиқча ишлаб чиқарилиши хавфи мавжудлиги ҳақида ёзган эди. Уларнинг баҳолашича, ички бозор имкониятлари чекланган, экспорт, жумладан, Россияга автомобиль етказиб бериш эса импорт қилувчи мамлакатларда амал қилаётган божлар туфайли иқтисодий жиҳатдан фойдасиз бўлиб қолиши мумкин.
