akorda.kz сайти фотосурати
АҚШ президенти Дональд Трамп Вашингтон ва Остона ўртасидаги ҳамкорлик мустаҳкамланаётганидан фахрланишини билдириб, Қозоғистон президенти Қосим-Жомарт Тўқаев билан учрашувни интиқлик билан кутаётганини таъкидлади. Бу ҳақда Трампнинг Тўқаевга Қозоғистонда 25 октябрь куни нишонланган Республика куни муносабати билан йўллаган телеграммасида айтилган. Телеграмма матнини Қозоғистон раҳбарининг матбуот хизмати эълон қилди.
«Ўтган бир йил давомида ҳамкорлигимизни чуқурлаштирганимиздан фахрланаман. Бу халқаро тинчлик ва хавфсизлик соҳасидаги ҳамкорликдан тортиб, ҳар икки мамлакатга манфаат келтирадиган муҳим тижорат келишувларининг тузилишигача бўлган жараённи қамраб олади.
1991 йилда Қўшма Штатлар Қозоғистонни халқаро майдонда суверен давлат сифатида биринчи бўлиб тан олган. Мамлакатингиз мустақиллиги, суверенитети ва ҳудудий яхлитлигини қўллаб-қувватлашга бўлган қатъий содиқлигимиз ўзгаришсиз қолмоқда.
Америка компаниялари Қозоғистоннинг иқтисодий соҳадаги салмоқли муваффақиятларида муҳим ўрин тутади ва бундан кейин ҳам шундай бўлиб қолади. Мамлакатларимиз ўртасида тобора мустаҳкамланаётган дўстлик ўн йиллар давомида сезиларли натижалар келтиришига ишонаман.
Декабрь ойида бўлиб ўтадиган G20 саммитида сиз билан учрашишни интиқлик билан кутяпман», — деб ёзган Трамп.
Америка раҳбари аввал ҳам Тўқаев ҳақида бир неча бор илиқ фикрлар билдирган. Қозоғистон президентининг ўтган йили Вашингтонга ташрифи чоғида Трамп уни «ажойиб президент» деб атаган эди. Шу йил кузида эса Қозоғистон мустақиллиги йиллиги муносабати билан Тўқаевни табриклар экан, уни «кучли ва қатъиятли етакчи» деб таърифлаган.
Жорий йил бошида АҚШнинг Қозоғистондаги элчиси Жули Стаффт мамлакатлар ўртасидаги муносабатлар бутун тарих давомидаги энг юқори даражага етганини айтган эди. «Олдимизда ҳали кўп ишлар турибди», — дея таъкидлаганди дипломат.
Экспертлар фикрича, Марказий Осиё, хусусан, Қозоғистон АҚШ ва Хитой ўртасида яримўтказгичлар, аккумуляторлар, сунъий интеллект технологиялари ва мудофаа маҳсулотлари учун хомашё бўлган муҳим минераллардан фойдаланиш борасидаги глобал рақобатнинг асосий йўналишларидан бирига айланмоқда. The National Interest маълумотларига кўра, минтақанинг беш мамлакати — Қозоғистон, Қирғизистон, Тожикистон, Туркманистон ва Ўзбекистон ҳиссасига жаҳон уран захираларининг қарийб 40 фоизи, марганец захираларининг 39 фоизи ва хром захираларининг 31 фоизи тўғри келади. Шунингдек, минтақада литий, мис, рух ва вольфрамнинг ҳам катта захиралари мавжуд. Минтақада бу борада Қозоғистон етакчи ўринни эгаллайди.
Ўтган баҳорда Американинг The Financial Times газетаси АҚШ президентининг ўғиллари Дональд Трамп кичик ва Эрик Трамп Қозоғистондаги дунёдаги ҳали ўзлаштирилмаган энг йирик вольфрам конларидан бирини ишлаб чиқиш билан шуғулланувчи компаниянинг ҳаммулкдорига айлангани ҳақида хабар берганди. Бу келишув, жумладан, лойиҳа АҚШ ҳукуматининг 1,6 миллиард долларгача бўлган миқдордаги кўмагига эга бўлгани ва президент ўғилларининг инвестициялари ушбу факт оммага маълум бўлишидан олдин амалга оширилгани сабабли эътиборни тортганди.
