Афғонистон фуқароси Муҳаммад Шарифулла АҚШда бир неча йил давомида «Ислом давлати — Хуросон вилояти» (ИШИД-Х, қатор мамлакатларда тақиқланган) террорчилик ташкилотини қўллаб-қувватлагани учун 20 йилга озодликдан маҳрум этилди. Бу ҳақда АҚШ Адлия вазирлиги хабар берди.
Расмий баёнотда қайд этилишича, Шарифулла 2016 йилдан 2025 йилгача содир этилган ИШИД-Хнинг ўндан ортиқ ҳужумларига алоқадор бўлган. У разведка ишлари, худкуш террорчиларни ташиш, қуролларни ташиш ва тозалаш, гуруҳ аъзолари ўртасида кўрсатмалар ва хабарларни етказиш, шунингдек, ИШИДнинг тарғибот мақсадлари учун портлашларни видеога олиш билан шуғулланган.
Энг оғир эпизодлар қаторида 2021 йил август ойида Кобул аэропортида содир этилган портлашлар ва 2024 йил март ойида Москва вилоятидаги «Крокус Сити Холл» концерт залида содир этилган теракт бор.
Судда келтирилган маълумотларга кўра, 2021 йил 26 август куни халқаро коалиция қўшинлари эвакуация операциясини ўтказаётган пайтда минглаб тинч аҳоли аэропортнинг шарқий дарвозаси олдида тўпланган. ИШИД-Х раҳбарияти Шарифуллага аэропортга олиб борувчи йўлни кузатиб бориш ва «Толибон»нинг назорат-ўтказиш пунктлари бор-йўқлигини аниқлашни топширган. Тахминан соат 14:00 да у ушбу йўналиш бўйлаб ҳаракатланиб, йўл очиқ эканини хабар қилган. Тахминан соат 17:36 да ИШИД-Х жангариси танасига маҳкамланган бомбани портлатган. Ҳужум оқибатида 13 нафар америкалик ҳарбий хизматчи ва қарийб 160 нафар тинч аҳоли ҳалок бўлган.
«Крокус Сити Холл»га ҳужум арафасида Шарифулла ИШИД-Х жангариларига Калашников автоматлари ва бошқа қуроллардан фойдаланиш бўйича кўрсатмалар берган, ҳужум вақтида эса улар билан алоқани сақлаб турган.
Эслатиб ўтамиз, «Крокус»даги теракт 2024 йил 22 март куни тахминан соат 20:00 да «Пикник» гуруҳининг концерти олдидан содир бўлганди. Қуролланган тўрт нафар эркак залга бостириб кириб, одамларни автоматлардан ўққа тутган, пичоқ билан ярадорларнинг айримларини ўлдирган, сўнг бинога ўт қўйган. Ўшанда турли маълумотларга кўра, 147 нафардан 150 нафаргача одам ҳалок бўлган. 609 киши яраланган, жабрланганларнинг умумий сони қарийб 1,7 минг нафарни ташкил этган. Зарар миқдори тахминан 6 млрд рублни (76 млн доллардан ортиқ) ташкил қилган. Иш бўйича 27 киши айбланувчи сифатида жалб этилган. Улар орасида тўрт нафар ҳужумчи, уларга автомобиль сотган уч киши, шунингдек, террорчиларга квартира ижарага берган ёки пул ўтказмаларини амалга оширган шахслар бор. Терактни бевосита амалга оширган тўрт киши умрбод озодликдан маҳрум этилган.
Шарифулла Покистонда қўлга олинган, уни ушлашда мамлакат ҳукумати Марказий разведка бошқармаси (CIA) разведка маълумотларидан фойдаланган. Террорчининг қўлга олингани ва кейинчалик АҚШга экстрадиция қилингани ҳақида 2025 йил 5 март куни президент Дональд Трамп маълум қилган. У афғонистонликни 2021 йилда Кобул аэропортидаги портлашга алоқадор «асосий террорчи» деб атаган. Трамп Покистонга «бу махлуқни қўлга олишдаги ёрдами» учун миннатдорлик билдирган.
