Россияга экстрадиция қилинишини кутиб, Олмаотадаги СИЗОда сақланаётган чеченистонлик фаол Мансур Мовлаев ўз жонига қасд қилишга уринди. Бу ҳақда унинг манфаатларини ҳимоя қилаётган юрист Вадим Дроздов «Новая газета Европа» нашрига маълум қилди.
Россия Антиуруш қўмитаси маълумотларига кўра, Мовлаевга ўз вақтида тиббий ёрдам кўрсатилган. Унинг ҳаёти хавф остида эмас.
Нашр ёзишича, фаол ўз жонига қасд қилишга уринишидан олдин мактуб қолдирган. Унда у ўз қарорини Россияга эҳтимолий экстрадиция қилиниши мумкинлиги қўрқуви билан изоҳлаган.
«Мени кечиринг, мен адолатсизликдан чарчадим! На суд, на прокуратура бизни эшитмаяпти! Улар [қодировчилар] мени қийнайди, азоблайди ва ўлдиради, кейин эса ўз жонига қасд қилди, деб айтишади. Мен энди ўзимни қийнашларига йўл қўймайман! 16 ой давомида экстрадиция бўлиш қўрқуви ва умид билан яшадим… Ҳозир эса фақат қўрқув!» — деб ёзган Мовлаев.
Мактубда у, шунингдек, Чеченистон раҳбарияти вакиллари унинг жасадини олиб кетишига йўл қўймаслик учун Қозоғистонда дафн этилишини сўраган.
Бундан ташқари, Мовлаев Олмаотадаги шу СИЗОда сақланаётган россиялик фаол Юлия Емельяновага ёрдам беришни сўраган. Қозоғистон ҳукумати аввалроқ уни Россияга экстрадиция қилишга розилик берган, бироқ Емельянова бу қарор устидан судга шикоят қилишга уринмоқда.
👉 Мансур Мовлаев Рамзан Қодиров режимига қарши чиққан «Адат» мухолифат ҳаракати иштирокчиси. 2020 йилда Россияда Мовлаев гиёҳванд моддаларнинг ноқонуний айланмаси билан боғлиқ айблов бўйича судланган. Бироқ, чеченистонлик фаоллар Иброҳим ва Байсангур Янгулбаевлар жиноий иш сохталаштирилганини таъкидламоқда.
2022 йилда муддатидан илгари шартли равишда озод қилинганидан сўнг, Мовлаевнинг айтишича, уни Чеченистон полиция ходимлари ўғирлаб кетган ва махфий қамоқхонада ушлаб турган. Кейинчалик у қочиб, Қирғизистонга борган, сўнгра эса экстрадиция қилиниши хавфидан қўрқиб, мамлакатни тарк этган. Қочиб кетганидан сўнг Мовлаев Олмаотага жойлашиб, мураббий бўлиб ишлаган. Шу вақтда Россияда фаол экстремизм иши бўйича федерал қидирувга берилган.
2025 йил май ойида у Россиянинг сўровига асосан Қозоғистонда қўлга олинган. Мовлаев ҳибсга олинган ва қамоқ муддати бир неча бор узайтирилган. Фаол республикада қочқин мақомини олишга уринди, бироқ Россия томони Қозоғистонни уни таъқиб қилиш сиёсат билан боғлиқ эмаслиги ва ватанида унга нисбатан қийноқ қўлланилмаслигига ишонтирган.
Яқинда Қозоғистоннинг Маъмурий ишлар бўйича Кассация суди қуйи инстанция судларининг Мовлаевга қочқин мақомини беришни рад этган қарорларини ўз кучида қолдирди.
