Sputnik фотосурати
Хорижда ишлаб, Ўзбекистонга қайтиб келган фуқаролар ўз бизнесини очиш ёки ривожлантириши учун 60 миллион сўмгача (тахминан 5,1 минг доллар) миқдорида грант олишлари мумкин. Бу ҳақда Ўзбекистон Миграция агентлиги хабар берди.
Дастур Халқаро миграция ташкилоти (ХМТ) билан ҳамкорликда, Швеция Адлия вазирлигининг молиявий кўмаги асосида амалга оширилмоқда. Грант учун 2025–2026 йилларда хорижда ишлаган ва кейин Ватанига қайтиб келган Ўзбекистон фуқаролари даъво қилишлари мумкин.
Танлов жараёнида ташкилотчилар бизнес-ғоянинг асосланганлиги, янги иш ўринлари яратиш истиқболлари, шунингдек, лойиҳанинг барқарорлиги ва самарадорлигини ҳисобга оладилар. Аёлларнинг иштирокига алоҳида рағбат берилади. Аризалар 21 сентябрга қадар қабул қилинади.
2024–2026 йилларда Буюк Британиянинг мавсумий ишчилар схемасида (Seasonal Workers Scheme) иштирок этган Ўзбекистон фуқаролари учун алоҳида грант дастури ҳам амал қилади. Номзодлар Тошкентда бир кунлик интенсив тренингдан ўтадилар. Шундан сўнг улар бизнес-режа тақдим этишлари ва тадбиркорлик тажрибасига эга эканликларини тасдиқлашлари керак бўлади. Грант олувчилар, шунингдек, икки йил давомида ХМТ билан ҳамкорлик қилишга розилик беришлари лозим. ХМТ мутахассислари дастурнинг иштирокчилар ҳаёт шароитларига таъсирини баҳолайдилар.
Буюк Британия йўналиши бўйича аризалар 20 сентябрга қадар қабул қилинади.
Буюк Британиядан қайтиб келган мавсумий ишчилар учун бундай дастур биринчи марта амалга оширилаётгани йўқ. 2025 йил август ойида Миграция агентлиги ва ХМТ кичик бизнесни очиш ёки ривожлантириш учун 60 миллион сўмгача (тахминан 5,1 минг доллар) грант ажратиш бўйича танлов эълон қилган эди. 2026 йил февраль ойида Агентлик энг яхши бизнес-режалар муаллифларидан тўрт нафари молиявий маблағ билан таъминланганини маълум қилди.
Сўнгги йилларда Буюк Британия Ўзбекистондан ташкиллаштирилган меҳнат миграциясининг асосий йўналишларидан бирига айланди. Мавсумий иш визаси мамлакатда 26 ҳафтагача бўлиш имконини беради, шундан сўнг ишчи ўз Ватанига қайтиши керак.
2026 йил июнь ойида Ўзбекистон ва Швеция миграция ва ҳаракатчанлик соҳасида шериклик тўғрисида ҳукуматлараро битим имзоладилар. Шу билан бирга, томонлар қонуний миграция ва академик алмашинувларга кўмаклашишни назарда тутувчи пилот дастурни ишга туширишга келишиб олдилар.
