alpinist.biz сайти фотосурати
Қирғизистон ҳукумати Тянь-Шань тоғ тизмасининг энг баланд нуқтаси бўлган Победа чўққисига чиқиш учун рухсатнома тизимини жорий қилди. Чўққини забт этишни режалаштираётган барча шахслар учун ушбу ҳужжат мажбурий бўлади, дея хабабер беради 24.kg нашри республика Туризмни ривожлантириш давлат агентлиги маълумотларига таянган ҳолда.
Янги тартиб аллақачон кучга кирган. Энди ҳар қандай альпинист Победа чўққисига кўтарилиш учун расмий рухсатнома олиши керак бўлади. Агентлик ушбу хизмат бепул ёки бепул эмаслигини аниқ маълум қилмаган.
Яқин вақт ичида ҳукумат юқори тайёргарлик даражасига эга тахминан 20 нафар альпинистга рухсатнома беришни режалаштирмоқда.
Агентлик маълум қилишича, янги тизимни жорий этишга Тянь-Шаннинг юқори ҳудудларида содир бўлган бир қатор бахтсиз ҳодисалар сабаб бўлган. Жумладан, ўтган йили россиялик альпинист Наталья Наговицина ҳалок бўлгани ҳам бунга сабаблардан бири сифатида қайд этилган.
ℹ️ Победа чўққисининг баландлиги 7439 метрни ташкил этади. Унга кўтарилиш дунёдаги энг мураккаб альпинистлик йўналишларидан бири ҳисобланади. Кузатувлар олиб борилган давр мобайнида ушбу ҳудудда камида 80 нафар альпинист ҳалок бўлган.
ℹ️ Наталья Наговицина 2025 йил 12 август куни альпинистлар гуруҳи таркибида Победа чўққисига чиқишни бошлаган. Чўққида у оёғини синдириб олган ва мустақил ҳаракатланиш имкониятини йўқотган. Биринчи ёрдамни унинг шериги кўрсатган, кейин у ёрдам олиб келиш учун пастга тушишга мажбур бўлган. Эртаси куни россиялик альпинист ёнига Италия ва Германиядан келган альпинистлар етиб борган. Улар ўзлари билан ухлаш халтаси, иситгич мосламаси, озиқ-овқат ва газ баллони олиб келишган. Тушиш вақтида италиялик Лука Синигилья совуқ уриши оқибатида ҳалок бўлган.
Наговицинани эвакуация қилишга қаратилган уринишлар муваффақиятсиз якунланган. 16 август куни Қирғизистон Мудофаа вазирлиги вертолёти қаттиқ қўнишни амалга оширган, натижада икки киши жароҳат олган. Кейин об-ҳаво шароити ёмонлашгани сабаб қутқарув операцияси тўхтатилган. Бир ҳафта ўтиб, Фавқулодда вазиятлар вазирлиги Наговицинанинг ҳалок бўлган бўлиши мумкинлигини тахмин қилган, 27 август куни эса у расман бедарак йўқолган деб тан олинган. Сентябрь ойи бошида россиялик альпинист аёлни қутқариш операцияси расман якунлангани маълум қилинган.
2021 йили Наговицинанинг турмуш ўртоғи ҳам Победа чўққисида ҳалок бўлган эди.
