Грегг Семенца. Жон Хопкинс университети фотосурати
Ўзбекистон Соғлиқни сақлаш ва фармацевтика соҳасини ривожлантириш агентлиги идора ҳузурида ташкил этилаётган Халқаро илмий кенгашга 2019 йил Нобель мукофоти лауреати, америкалик профессор Грегг Семенцани (Gregg L. Semenza) таклиф қилди. Тегишли ташаббус олим билан ўтказилган онлайн учрашувда билдирилди, дея хабар беради Ўзбекистон агентлиги матбуот хизмати.
Идора раҳбари Абдулла Азизов профессорга Марказий Осиё республикасида тиббиёт ва фармацевтика соҳасида амалга оширилаётган ислоҳотлар ҳақида батафсил маълумот берган. Хусусан, инновацион ёндашувларни кенг жорий этиш масалаларига алоҳида эътибор қаратилган. Шунингдек, мулозим олимни Тошкент вилоятида жойлашган BioPharma City фармацевтика кластери фаолияти билан таништирган.
Учрашув давомида Ўзбекистонда биофармацевтика соҳасини ривожлантириш, замонавий илмий мактабларни шакллантириш ҳамда бу йўналишда халқаро тажрибани қўллаш истиқболлари муҳокама қилинган.
Натижада Грегг Семенца Ўзбекистон Республикаси Тиббиёт ва фармацевтика соҳасини ривожлантириш агентлиги ҳузуридаги Халқаро илмий кенгаш таркибига киришга таклиф этилди.
«Нобель мукофоти лауреатини Халқаро илмий кенгаш фаолиятига жалб этиш Ўзбекистоннинг илм-фан ва фармацевтика соҳасидаги халқаро нуфузини мустаҳкамлаш, фундаментал ва амалий тадқиқотларни янги босқичга олиб чиқиш, шунингдек, жаҳоннинг етакчи олимлари билан узоқ муддатли ҳамкорликни ривожлантириш йўлида муҳим қадам бўлади», — дейилади идора хабарномасида.
ℹ️ Грегг Семенца — АҚШдаги Жон Хопкинс университети профессори. У 2019 йилда физиология ва тиббиёт соҳасида Нобель мукофотига сазовор бўлган. Олим ушбу мукофотни ҳужайралар кислород даражасини қандай қабул қилиши ва унга қандай мослашиш механизмларини кашф этгани учун кичик Уильям Кейлин ва Питер Рэтклифф билан биргаликда олган.
Шунингдек, америкалик олим HIF1A оқсилини кашф этган олимлардан бири ҳисобланади. Нуфузли рейтингларга кўра, Семенца дунёдаги энг кўп иқтибос келтириладиган олимлар қаторига киради — унинг илмий ишларига 150 мингдан ортиқ марта ҳавола қилинган.
