daryo.uz сайти фотосурати
Ўзбекистонда ёзги мавсумда электр энергияси истеъмоли бўйича янги рекорд қайд этилди. 13 июль куни мамлакат бўйича суткалик электр энергияси истеъмоли 278,6 миллион киловатт-соатни ташкил этди. Бу 2025 йил 18 июлда қайд этилган аввалги рекордга нисбатан 6 миллион киловатт-соат ёки 2,2 фоизга кўпдир. Бу ҳақда республика Энергетика вазирлиги матбуот хизмати хабар қилди.
Қайд этилишича, ҳаво ҳарорати юқори бўлган шароитда Ўзбекистон ягона энергетика тизими янги рекордни қайд этган. Шу билан бирга, суткалик электр энергияси ишлаб чиқариш ҳажми истеъмолдан юқори бўлиб, 281,5 миллион киловатт-соатга етган.
Маълумот учун, ўтган йилги рекорд қайд этилган куни мамлакатнинг марказий ҳудудларида ҳаво ҳарорати +40 даража, чўл ҳудудларида эса +44 даражагача кўтарилган эди.
Жорий йилнинг июль ўрталарида ҳам ҳаво ҳарорати худди шундай юқори даражада сақланмоқда. Синоптиклар прогнозига кўра, бу вазият яна давом этиши кутилмоқда.
« Ҳаво ҳароратининг ошиши муносабати билан яқин кунларда электр энергияси истеъмоли ва тизим юкламаси бўйича янги рекорд кўрсаткичлар қайд этилиши кутилмоқда», — дейилади Энергетика вазирлиги хабарида.
Янги рекорд кўп куттирмади. Энергетика вазирлигининг янгиланган маълумотларига кўра, 14 июль куни Ўзбекистонда электр энергияси истеъмоли 284 миллион киловатт-соатга етди. Вазирлик таъкидлашича, бу кўрсаткич мутлақ рекорд ҳисобланади, чунки у нафақат ёзги, балки қишки даврдаги рекорд кўрсаткичдан ҳам ошиб кетган.
Бунга қадар энг юқори кўрсаткич 283 миллион киловатт-соат даражасида қайд этилган бўлиб, у 2026 йил 24 январга тўғри келади.
Вазирликда маълум қилишича, жазирама иссиқ туфайли энергетика корхоналари кучайтирилган иш режимига ўтказилган. Махсус авария-тиклаш бригадалари кечаю кундуз навбатчилик қилмоқда.
Шу билан бирга, вазирлик огоҳлантиришича, республиканинг айрим ҳудудларида электр тармоқларидаги техник носозликлар сабаб электр таъминотида вақтинчалик узилишлар юз бериши мумкин.
Шу билан бирга, мутасаддилар аҳолидан электр энергиясидан оқилона ва тежамкорлик билан фойдаланишни сўрайди. Хусусан, энг юқори юклама кузатиладиган соатларда фойдаланилмаётган электр жиҳозларини ўчириб қўйиш тавсия этилган. Энергетика вазирлиги таъкидлашича, шу тариқа мамлакатнинг ҳар бир фуқароси барқарор электр таъминотини таъминлаш ва тизимда юзага келиши мумкин бўлган носозликларнинг олдини олишга ҳисса қўшиши мумкин.
Ғайриоддий иссиқ ҳаво шароитида Ўзбекистон Давлат меҳнат инспекцияси иш берувчиларга очиқ ҳавода меҳнат қилаётган ходимлар хавфсизлигини таъминлаш чораларини кўриш бўйича мурожаат қилди. Тавсияларга кўра, куннинг энг иссиқ пайти — соат 11:00 дан 16:00 гача бўлган вақтда очиқ ҳаводаги ишларни чеклаш ёки тўлиқ тўхтатиб туриш лозим. Шунингдек, ходимларнинг тоза ва салқин ичимлик суви билан таъминланиши, уларнинг мунтазам равишда сояда ёки салқин хоналарда дам олиши учун шароит яратилиши ҳамда тиббий назорат остида бўлиши зарурлиги қайд этилган.
Қайд этиш жоиз, жорий йили электр энергияси истеъмоли бўйича рекорд Марказий Осиёнинг яна бир давлати — Қирғизистонда ҳам қайд этилди. «Қирғизистон миллий электр тармоқлари» компанияси маълум қилишича, 29 июнь куни республика энергетика тизимида электр энергияси истеъмоли 47,1 миллион киловатт-соатни ташкил этган. Бу ёзги мавсумда кузатувлар тарихидаги энг юқори кўрсаткич ҳисобланади. Энергетиклар истеъмол ҳажмининг ўсишини янги кўп қаватли уйлар, ижтимоий ва саноат объектларининг фойдаланишга топширилиши билан изоҳлаган. Шунингдек, компания маълумотига кўра, ҳар йили электр энергияси истеъмолчилари сони ўртача 30 минг нафар абонентга кўпайиб бормоқда.
