Танкодром. Тожикистон президенти матбуот хизмати фотосурати
Тожикистоннинг «Ҳарбмайдон» полигонида танкодром ва Афғонистон билан чегарада тўртта янги чегара назорат постлари фойдаланишга топширилди. Бу ҳақда президент матбуот хизмати хабар берди.
Очилиш маросими Мудофаа вазирлиги биносида президент Эмомали Раҳмон ва унинг ўғли — Тожикистон парламенти раиси ва Душанбе мэри Рустам Эмомали иштирокида масофадан туриб бўлиб ўтди.
«Ҳарбмайдон» полигонида ихтисослашган мутахассислар учун ўқув иншоотлари, шунингдек, ҳайдовчилик синфлари ва кузатув минораларига эга қўмондонлик-кузатув пункти қурилган.
Афғонистон билан чегаранинг илгари етарли даражада ҳимояланмаган баландликдаги қийин ўтиш қисмида тўртта чегара пости очилди. Ушбу ҳудудда чегара постларининг узлуксиз ишлашини таъминлаш учун 70 километрдан ортиқ узунликда янги йўл ва бошқа ёрдамчи инфратузилма қурилди.
Таъкидланишича, сўнгги уч йил ичида Тожикистонда 80 та янги чегара пости қурилган. Улар техникалар, казармалар ва зарур инфратузилма, жумладан, офицерлар ва уларнинг оилалари учун алоҳида турар-жой бинолари билан жиҳозланган.
