«Нефтчи». «Нефтчи» матбуот хизмати фотосурати
Фарғонанинг «Нефтчи» футбол клуби 24 йилдан сўнг Ўзбекистон чемпионлигини қўлга киритди. Жамоа мураббийи, тожикистонлик мутахассис Виталий Левченкога уч хонали квартира берилди, футболчиларга эса автомобиллар ва бир хонали квартиралар топширилди.
«Нефтчи» жамоаси чемпионликни муддатидан олдин қўлга киритишга муваффақ бўлди. 22 ноябрь куни, 29-турда Фарғона жамоаси Навоийнинг «Қизилқум» жамоасини ўз майдонида 4:1 ҳисобида мағлуб этиб, мухлисларга ҳақиқий шодлик бахш этди.
«Нефтчи» охирги марта 2001 йилда олтин медални қўлга киритган эди. Бу жамоанинг тарихдаги олтинчи марта чемпион бўлиши.
Шуни таъкидлаш лозим, жамоа бош мураббийи, тожикистонлик мутахассис Виталий Левченко жамоани уч ярим мавсум давомида шакллантирган.
Клуб раҳбарияти мутахассисга Фарғонада уч хонали квартира билан қилган меҳнати учун миннатдорчилик билдирди. Шунингдек, футболчиларга BYD ва Chevrolet Onyx автомобиллари, шунингдек, бир хонали квартиралар совға қилинди.
Айни пайтда, Ўзбекистон чемпионатида кумуш ва бронза медаллари учун кураш давом этмоқда. Медал учун «Пахтакор», «Насаф» ва Самарқанднинг «Динамо» жамоалари кураш олиб боришмоқда. Мукофот эгалари финал босқичида аниқланади.
