Марказ мутахассислари ва ходимлари. cisc.uz сайти фотосурати
Тошкентда Ислом цивилизацияси марказининг очилиши ва Ўзбекистонда ўқитувчилар ва мураббийлар кунини нишонлаш арафасида Марказ ўз эшикларини халқаро экспертлар учун очди, деб хабар беради Марказ матбуот хизмати.
Меҳмонлар орасида — БААнинг Khalifa University of Science & Technology президенти, доктор Иброҳим Ал Ҳажри, Буюк Британия Cambridge University Press & Assessmentнинг Европа, Марказий Осиё ва Америка бўйича координатори Стивен Ричард, шунингдек «Yangi Oʻzbekistan» университети президенти Вольфганг А. Херрманн. Мутахассислар Марказ фаолияти, тугалланган илмий лойиҳалари ва келгусидаги ташаббуслари билан танишдилар.
Доктор Иброҳим Ал Ҳажри ўз таассуротларини қуйидагича баён этди:
«Бу бино — ислом ва адабиёт тарихини, шу заминда туғилиб, бутун дунёга илм-фан меросини бағишлаган улуғ алломалар руҳини мужассам этувчи гўзал ва рамзий иншоот. Биз ҳали ҳам Ал-Хоразмий, Ибн Сино сингари алломаларнинг кашфиётларидан баҳрамандмиз. Бу марказ ана шу тарихни сақлайди ва келажак авлодга етказади».
ℹ️ Ислом цивилизацияси маркази Хасти-Имом мажмуаси ёнида қурилмоқда. Иншоот қадимги меъморий обидалар шаклида бунёд этилмоқда. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Марказнинг энг асосий қисмида Қуръони карим зали бунёд этилмоқда. Бу ерда 460 ўринли анжуманлар зали ҳам қуриб битказилди. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
