autostrada.uz сайти фотосурати
Тошкентдан Самарқанд ва Андижонгача бўлган пуллик автомобил йўллари қурилиши 2026 йилга қадар бошланмайди. Бу ҳақда Ўзбекистон Иқтисодиёт ва молия вазирлиги маълум қилди.
2026-2028 йилларга мўлжалланган фискал стратегияда мазкур лойиҳалар устувор йўналишлардан экани, шунингдек, мавжуд автомобил йўлларини халқаро инвесторларни жалб этган ҳолда янгилаш ва таъмирлаш кўрсатилган. Хусусан, илғор халқаро тажрибани ҳисобга олган ҳолда мавжуд йўлларнинг ўтказувчанлиги ва хавфсизлигини ошириш ишлари кўзда тутилган.
ℹ️ Автотранспорт соҳасини ривожлантириш чора-тадбирлари қаторида биринчи марта пуллик автомобил йўллари қурилиши Ўзбекистон президенти Шавкат Мирзиёевнинг 2018 йил июль ойида қабул қилган қарорида тилга олинган эди. Ўшанда лойиҳа Германиянинг GP Papenburg Baugesell schaft компанияси томонидан амалга оширилиши тахмин қилинган эди. 2018 йил сентябрь ойида Cengiz-Kolin-Kalyon консорциуми билан «Тошкент-Самарқанд» йўлини қуриш бўйича шартнома имзоланган. Декабрь ойида пуллик автомобил йўллари тўғрисида ҳукумат қарори қабул қилинган бўлса, 2019 йил май ойида давлат-хусусий шериклик тўғрисидаги қонун имзоланганди.
Аввалроқ Транспорт вазирлиги 2025 йили Тошкентдан Самарқанд ва Андижонгача бўлган пуллик автомобил йўллари қурилиши бўйича тендерларни якунлаш ниятида эканини маълум қилганди.
▶️ Лойиҳага кўра, Тошкент-Андижон автомобил йўли Ангрен ва Попдан ўтади, унинг умумий узунлиги 314 км.ни ташкил қилади. Фойдаланишга топширилгандан сўнг шаҳарлар ўртасидаги йўл 5 соатдан 3 соатгача қисқаради, бахтсиз ҳодисалар сони 40 фоизга камаяди, Ўзбекистон иқтисодиётига қўшадиган ҳисса ялпи ички маҳсулот ўсишининг қарийб 2,6 фоизини ташкил қилади. Пуллик йўлнинг дастлабки қиймати 4,28 миллиард долларни ташкил этади.
2025 йил январь ойида расмийлар халқаро тендер эълон қилди, 30 дан ортиқ хорижий компаниялар лойиҳада иштирок этиш истагини билдирди. Лойиҳа 6 йил 3 ойда амалга оширилади, шундан 64 фоиз йўналиш қайта қурилади, 36 фоизи реконструкция қилинади. Йўл I-а (автомобил йўли) тоифасига киради ва цемент-бетон қопламали олтита қаторни ўз ичига олади.
▶️ Тошкент-Самарқанд автомобил йўли ҳам олти полосали бўлиб, узунлиги 300 км бўлади. Қурилишнинг дастлабки қиймати 2,2 миллиард долларга баҳоланган. ЕТТБ лойиҳанинг техник-иқтисодий асосларини ишлаб чиқиш учун 350 минг доллар миқдорида грант маблағлари ажратди ва Туркиянинг Proyapı Mühendislik ve Müşavirlik A.Ş компаниясини ёллади, у билан 1 миллион еврога шартнома имзоланди. Лойиҳа 2028 йил охиригача ишларни якунлашни кўзда тутади, шундан сўнг йўл ДХШ модели бўйича хусусий оператор бошқарувига ўтказилади.
