yuz.uz сайти фотосурати
Ўзбекистон президенти Шавкат Мирзиёев тегишли идораларга электрон давлат хизматларини ривожлантиришнинг навбатдаги босқичи бўлмиш «Рақамли ҳукумат»ни яратиш бўйича топшириқ берди. Республика раҳбарининг фикрича, биринчи навбатда, соғлиқни сақлаш, таълим, қурилиш, коммунал хизмат кўрсатиш каби соҳаларга эътибор қаратиш лозим. Ушбу лойиҳа 1 июль куни илғор технологиялар соҳасидаги режалар тақдимотида муҳокама қилинди, деб хабар беради давлат раҳбари матбуот хизмати.
Тадбир давомида мутасаддилар бугунги кунга қадар 760 турдаги давлат хизматлари рақамлаштирилганлиги ҳақидаги статистик маълумотларни келтирди. Ўтган йили 10 миллион фуқаро ушбу хизматлардан фойдаланган. Бу борадаги ишлар давом эттирилади.
Шу билан бирга, бошқа ташаббуслар ҳам амалга оширилмоқда. Ўзбекистонда сунъий интеллект (СИ) технологияларини ривожлантириш стратегияси қабул қилингани алоҳида таъкидланди. Тегишли инфратузилмани яратиш учун 50 миллион доллар ажратилди. Ҳукумат олдида СИ миллий моделини ишлаб чиқиш ва бир миллион мутахассисни тайёрлаш вазифаси турибди.
IT-хизматлар ҳажмини ошириш ва экспорт қилиш ҳам устувор вазифа бўлиб қолмоқда. Айни пайтда саноат корхоналарининг аксарияти Тошкент шаҳрида жойлашгани боис мамлакат расмийлари ҳудудларда хорижий компаниялар учун жозибадор муҳит яратишдан манфаатдор.
Тақдимотда Ўзбекистоннинг ахборот технологиялари соҳасидаги ютуқлари ҳақида сўз юритилди. Шундай қилиб, IТ-парк резидентлари сони 2800 нафардан ошди, шундан 752 нафари хорижий корхоналардир. Соҳада банд бўлган 40 мингга яқин ёшлар юқори маош олаётгани таъкидланди.
Охирги 5 йилда соҳа экспорти 170 миллион доллардан 1 миллиард долларга яқинлашди. Интернет тезлиги 7 баробар, мобиль интернет эса 4,5 баробар ошди. Ўтган йили соҳадаги стартапларга 70 миллион доллар венчур инвестиция киритилди.
Буларнинг натижасида «Глобал стартаплар индекси» рейтингида Ўзбекистон 12 поғона юқорилаб, «ТОП-100»ликка кирди. Ўтган йили «Сунъий интеллектга тайёрлик» халқаро индексида мамлакат 17 поғона кўтарилиб, Марказий Осиёда 1-ўринни эгаллади. Ўзбекистон телекоммуникация соҳасининг ўсиш суръатлари бўйича МДҲ мамлакатлари рейтингида биринчи ўринни эгаллади.
Бундай ишлар изчил давом эттирилмоқда. Келгуси йил учун улкан мақсадлар қўйилди:
✅ давлат хизматларини рақамлаштиришни 70 фоизга еткказиш;
✅ IT хизматлари миқдорини 100 триллион сўмга ($7,8 млрд) етказиш;
✅ Электрон ҳукумат ривожланиш индексида камида 55-ўринга кўтарилиш мақсад қилинган.
