Аббос Файзуллаев. championat.com сайти фотосурати
Ўзбекистонлик футболчи Аббос Файзуллаевнинг Москва ЦСКА клубидан Португалиянинг «Бенфика» клубига ўтиши бўйича тузилган трансфер келишуви европаликларнинг Россия билан иш юритишни истамагани боис амалга ошмай қолди. Бу ҳақда Pro Sports Management компанияси раҳбари Герман Ткаченко Sport24 нашрига берган интервьюсида айтиб ўтди.
Ткаченкога кўра, Россияга нисбатан муносабат юмшаб бормоқда. Россия клубларидан Англия ва Францияга бир қанча трансферлар амалга оширилган. Аммо салбий мисоллар ҳам бор. Шулардан бири Москванинг ЦСКА клубида тўр сураётган ўзбекистонлик ярим ҳимоячисининг Португалиянинг «Бенфика» клубига ўтказилмаганидир.
«Биз Файзуллаевни «Бенфика» билан муҳокама қилдик. Лекин биринчи босқичдаёқ клуб россияликлар билан ўзаро муносабатлар борасида «йўқ» деди. Шу билан алоқалар узилиб қолди. «Биз Россия билан иш олиб бормаймиз» тезиси пайдо бўлди», — деди Ткаченко.
Ғарб мамлакатларида Россия билан боғлиқ бўлган барча нарсаларга cancelling (бекор қилиш) қўлланиши Кремлнинг Украина ҳудудида махсус ҳарбий операция бошланганидан сўнг тез-тез учрамоқда.
ℹ️ Аббос Файзуллаев — «Пахтакор»да тарбия топган, у билан уч карра Ўзбекистон чемпиони бўлган. 2023 йил август ойида у Москванинг ЦСКА клубига ўтган ва у ерда жамоа етакчиларидан бирига айланди. Файзуллаев Ўзбекистон олимпия ва асосий терма жамоаларининг асосий футболчиси ҳисобланади ва улар таркибида 25 та ўйин ўтказиб, 8 та гол урган ва 2 та голли узатма муаллифи саналади.
