ИТБ матбуот хизмати фотосурати
Ислом тараққиёт банки (ИТБ) Ўзбекистонга таълим тизимидаги инклюзив муҳит сифатини яхшилаш ва А-373 автомобиль йўлини модернизация қилиш учун 299 миллион доллар ажратади. Бу ҳақдаги келишувлар Ал-Ула шаҳрида (Саудия Арабистони) ривожланаётган бозорлар мамлакатлари конференциясида имзоланди. Ҳужжатларни ИТБ раиси Муҳаммад Ал-Жассер ҳамда Ўзбекистон Бош вазири ўринбосари, Иқтисодиёт ва молия вазири Жамшид Қўчқоров имзолади, деб хабар беради банк матбуот хизмати.
Биринчи келишув Ўзбекистонда лаборатория жиҳозлари, тегишли мебель ва рақамли инфратузилма билан жиҳозланган 58 та инклюзив мактаб қуришни кўзда тутади. Режага кўра, 2431 та ўқув хоналари қуриш, ўқув дастурлари ва материалларни такомиллаштириш, ўқитувчилар малакасини ошириш дастурлари, ўқувчиларни баҳолаш механизмларини ислоҳ қилиш, барча талабалар учун тенг имкониятларни таъминлаш мақсадида инклюзив таълим моделларини жорий этиш кўзда тутилган. 2026 йилга бориб Ўзбекистонда барча болалар инклюзив тизим доирасида сифатли таълим олиш имкониятига эга бўлиши кутилмоқда. ИТБ ушбу лойиҳа учун 160,25 миллион доллар ажратади.
Иккинчи келишув А-373 автомобиль йўлини реконструкция қилиш ва модернизация қилиш билан боғлиқ бўлиб, бунинг учун ИТБ 138,8 миллион доллар ажратишга тайёр, маблағлар йўл вақтини 50 фоизга (2030 йилгача 30 дақиқагача) қисқартириш ва авариялар сонини 40 фоизга (йилига 24 та ҳодисагача) камайтиришга қаратилган. Ташаббус, шунингдек, ортиб бораётган транспорт эҳтиёжларини қондириш учун мавжуд тўрт полосали йўлни янгилашни, минтақавий ва маҳаллий алоқани яхшилашни, хавфсизликни оширишни ва савдо йўлларини оптималлаштиришни ўз ичига олади.
👉 А-373 автомобиль йўли Е007 Европа йўналишининг бир қисми бўлиб, Тошкентни Ўш (Қирғизистон) билан боғлайди. ИБР маблағлари ҳисобидан автомобиль йўлининг қайси қисми модернизация қилиниши аниқланмаган.
ℹ️ 2023 йил апрель ойида ИТБ Ўзбекистонга жами 396,7 миллион доллар миқдорида учта кредит ажратишни режалаштираётганини эълон қилганди, бу маблағлар болалар боғчаларини қуриш ва реконструкция қилиш, қишлоқни комплекс ривожлантириш лойиҳасини молиялаштириш, шунингдек, Ўзбекистон, Қозоғистон ва Қирғизистон ҳудудидан ўтувчи М39 йўлини реконструкция қилиш ва модернизация қилиш учун мўлжалланган. Шу билан бирга, 2003 йилдан буён ИТБ Ўзбекистонга умумий қиймати 3,46 миллиард доллар миқдорида кредитлар ажратгани қайд этилган.
