Владимир Путин ва Шавкат Мирзиёев. president.uz сайти фотосурати
19 декабрь куни Ўзбекистон ва Россия президентлари Шавкат Мирзиёев ва Владимир Путин телефон орқали хавфсизликка таҳдид ва хатарларга қарши курашни кучайтириш мақсадида икки мамлакат махсус хизматлари ўртасидаги ҳамкорликни муҳокама қилдилар. Шунингдек, минтақавий ташкилотлар доирасидаги кўп томонлама ҳамкорликнинг долзарб масалалари кўриб чиқилди. Бу ҳақда Ўзбекистон раҳбари матбуот хизмати хабар берди
Қўнғироқ Ўзбекистон томони ташаббуси билан бўлиб ўтди, дея таъкидлайди Кремль.
Мирзиёев Россия Қуролли кучларининг радиация, кимёвий ва биологик ҳимоя қўшинлари бошлиғи Игорь Кириллов ва унинг ёрдамчиси Илья Поликарпов вафоти муносабати билан ҳамдардлик билдирди.
«Ўзбекистон ушбу қабиҳ террорчилик ҳаракатини кескин қоралаши таъкидланди. Икки давлат махсус хизматлари ўртасида терроризмга қарши курашиш соҳасида яқин ҳамкорликни давом эттиришга урғу берилди», — дейилади Кремл баёнотида.
Мирзиёев, шунингдек, Путинни йил якунида тўғридан-тўғри мулоқот ва катта матбуот анжумани муваффақиятли ўтказилгани билан табриклади. Президентлар барча соҳаларда ўзаро манфаатли алоқаларни янада ривожлантириш истагини тасдиқладилар.
ℹ️ Кириллов ва Поликарпов 17 декабрь куни теракт дея таснифланган портлаш натижасида ҳалок бўлди. 29 ёшли Ўзбекистон фуқароси Аҳмад Қурбонов теракт содир этишда гумон қилинмоқда. У ҳибсга олинган ва сўроқ пайтида Украина махсус хизматлари томонидан ёлланганини айтган.
