Қирғизистонда Қозоғистон ва Тожикистон фуқароларини рўйхатга олишнинг янги тартиби жорий этилмоқда

akchabar.kg сайти фотосурати

2024 йил 5 сентябрдан Қирғизистонда визасиз режимга эга мамлакатлар фуқаролари, жумладан, Қозоғистон ва Тожикистон фуқаролари учун янги рўйхатга олиш тартиби кучга киради. Бу ҳақда Рақамли ривожланиш вазирлиги матбуот хизмати хорижликларга эслатди.

Рақамли ривожланиш вазирлиги янги қоидалар саккиз мамлакат фуқароларига таъсир қилишини таъкидлайди:

✅ Қозоғистон;

✅ Тожикистон;

✅ Россия;

✅ Грузия;

✅ Озарбайжон;

✅ Арманистон;

✅ Беларусь;

✅ Молдова.

Агар илгари Қирғизистонга кирган юқорида қайд этилган давлатлар вакиллари узайтириш имконияти билан олти ойга рўйхатдан ўтишлари мумкин бўлган бўлса, бундан буён улар республикада шахсий мақсадларда иш, ўқиш ва бизнес ҳужжати билан боғлиқ бўлмаган тақдирда 60 календар кундан ортиқ бўлиш ҳуқуқини алоҳида тасдиқлашлари керак бўлади.

Рухсатга қуйидаги ҳужжатлар асос бўлиши мумкин:

👉 яшаш учун рухсатнома;

👉 фуқаролиги бўлмаган шахснинг гувоҳномаси;

👉 «Кайрылман» гувоҳномаси (чет эллик бўлган, лекин ўз тарихий ватанига кўчиб ўтмоқчи бўлган этник қирғизлар);

👉 «Мекен-карт» сертификати (хорижий фуқаролиги бўлган ватандош ҳужжати).

Қайд этилишича, яшаш учун рухсатнома 15 иш куни ичида бир йил муддатга берилади ва ҳар йили узайтирилади, лекин унинг муддати беш йилдан ортиқ бўлмайди. Ушбу ҳужжат Рақамли ривожланиш вазирлигининг ҳудудий бўлинмаси ёки Давлат хизматлари марказида расмийлаштирилиши мумкин.

Шунингдек, янги қоидаларга кўра, бошқа ўзгаришлар ҳам назарда тутилган. Евроосиё иқтисодий иттифоқи (ЕОИИ) мамлакатлари – Россия, Беларусь, Арманистон, Қозоғистон фуқаролари Қирғизистонда ҳар 180 кунлик муддат давомида 90 кунгача рўйхатдан ўтмасдан қолишлари мумкин. Тожикистон, Грузия, Озарбайжон ва Молдова вакиллари учун бу муддат 120 кунлик муддат ичида 60 кунни ташкил қилади. Рақамли ривожланиш вазирлиги белгиланган муддат тугагандан сўнг рўйхатдан ўтмаган хорижликларни республикани тарк этиши кераклигини эслатади. Бироқ, улар тегишли равишда 90 ёки 60 кундан кейингина мамлакатга қайта ташриф буюриш ҳуқуқини қўлга киритадилар.

Бундан ташқари, расмийларнинг қўшимча қилишича, Молдова фуқаролари Қирғизистонга кирган кундан бошлаб беш иш куни ичида, Озарбайжон фуқаролари – 15 кун, ЕОИИ давлатлари – 30 кун, Тожикистон – 60 кун, Грузия фуқаролари 90 кун ичида рўйхатдан ўтишлари шарт.